MUP te kan tobul min hriattirtu an nih thu sawi

PWD changtu Minister Vanlalhlana chuan MUP member-te chu kan tobul min hriattirtu leh history a taka kan hmuh theihte an ni tih a sawi.

Kum 1974 November ni 3-a din Mizoram Upa Pawl (MUP), Chaltlang Branch ten an kum 50 tlinna, Golden Jubilee lawmna nimin-a Tourist Lodge, Chaltlang-a an buatsaih a hmanpuina ah PWD Minister Vanlalhlana chuan MUP member te chu Mizoram innghahna pawimawh tak an nih thu leh an tawnhriatte chu khawtlang tana rohlu a nih thu a sawi a, “MUP member-te chu kan tobul min hriattirtu leh history a taka kan hmuh theihte an ni,” tiin chhuan lo awm zel turte hnenah an thiamfinnate hlan chhawng zel thei turin an kianga hun tam zawk hman a tul hle tih a sawi a, mihring kumbi chhiarah upat chu natna ni lovin hnehna a nih zawk thu a sawi bawk. Khawvel inher danglam zelah upate chu thalaite finchhuah tura thawhpui turte, hmasawnna hna thawhte thlenga uluk taka vilpui thin tur leh ram rorelna ah pawh ram hruaitute finchhuahtu nih tum zel turin a chah nghal bawk a ni.