Biodiversity Management Committee ten training nei

Mizoram State Biodiversity Board chuan nimin khan Biodiversity Management Committee (BMC) Member-te tan Capacity Building & Training a buatsaih a, EF&CC Department changtu Minister Lalthansanga chuan a hmanpui a ni.

Capacity Building & Training-ah hian Mizo-ram chhunga BMC thlanchhuah 12 atangin Member 24 an tel a, heng BMC te hi – Kawnpui-I BMC, Khawbel BMC, Khamrang BMC, Leng BMC, North Lungleng BMC, NE Tlang-nuam BMC, Phulpui BMC, Sailulak BMC, Sairep BMC, Teikhang BMC, Keifang Venglai BMC leh Pangzawl South BMC te an ni a. Heng BMC te zinga Bank Account hawng tawh BMC 4 hnenah Minister hian hmalakna atana bul an tanna tur Rs. 20,000/- theuh a hlan a, BMC dangte pawhin Bank Account an hawn veleh pawisa hi an dawng dawn a ni.

Chief Wildlife Warden Conference Hall, Aizawl-a Training-ah hian EF&CC Minister chuan BMC mawhphurhna leh hnathawh tur hi a tamin a zau hle tih sawiin, nungchate leh ramngaw humhalh kawngah sawrkar tha tichak a, mipuite rilru puthmang a dik zawnga kaihhruai kawngah an tangkai hle dawn tih a sawi a, an pawimawhna hria a theihtawp chhuah turin a chah a ni. He hunah hian Biodiversity awmzia leh pawimawhna te, BMC te chanvo, tihtur leh mawhphurhna bakah hmalak dan tur chungchang te zirho a ni.