Ram lak sak tawh te chhuak turin hriattir nawn leh

National Highway-54 leihzauh hna thawha sawrkar in ram a lak tawh, mahni ram la chhuahsan lo te chu chhuak tura hriattir nawn leh an ni.
Serchhip District chhunga NH-54, Aizawl - Tuipang kawng laih zauhna atana Dan anga sawrkarin ram a lak fel tawh, tun thlenga mahni ram la chhuahsan lo te chu sawrkar ram lak chin te hi chhuahsan vek turin Serchhip District Bawrhsap Paul L. Khuma chuan a hriattir a. Hemi chungchanga nimin-a thuchhuah a siamah Bawrhsap chuan Serchhip District chhunga NH-54, Aizawl - Tuipang kawng laih zauhna tura ram lak chu The National Highways Act, 1956 hnuaiah zawh tawh a nih thu leh he dan Section 3A hnuaiah ram lak tur thu chhuah niin, Section 3C hnuaiah sawi duh neite tan hearing hun siam a nih bakah Section 3D hnuaiah ram lak tur chin chu Sawrkar Official Gazette leh Public Notice chanchinbu pahnih-ah chhuah niin heng ram lakte hi Sawrkar kutah an awm tawh tih a sawi a. Section 3G hnuaia ram lak chin compensation chhut chhuah chu Section 3H in a tarlan angin ram neitute hnenah pek an nih tawh thu leh JICA guidelines zulzuia siam RAP Report-a Entitlement Matrix angin Rehabilitation & Resettlement Award pawh a dawng turte hnenah sem a ni tawh bawk tih a saw a ni.

Bawrhsap chuan National Highway atana ram lak tawhte hi ‘President of India’ hminga dah a nih tawh dawn avangin Compensation dawng tawhte leh Rehabilitation & Resettlement Award dawng tawh zawng zawngte chuan an ram lak chin hi an hauh zui a thiang tawh lo tih tarlangin, “Hemi atan hian Section 3E of the National Highways Act, 1956 hnuaiah vawi tam tak ram neitute hnenah hian ram lak chin chhuahsan tura hriattirna chhuah tawh a ni a. Tun thlenga hemi dan hnuaia ram lak tawh, mahni ram la chhuahsan lote chu Section 3E(2) angin ram lak chin hi chhuahsan vek tura hriattir an ni,” tiin thupek zawm lo te chungah dan anga hmalak a ni ang tih a tarlang bawk.