Chapchar Kut ngaihtuah tan

Nimin khan Chief Minister Lalduhoma hovin Chapchar Kut Organising Committee chu CM Conference Hall-ah an thukhawm a, he hunah hian kum 2025-a Chapchar Kut hman tur atan inbuatsaihna hrang hrang thlirin, Programme Committee leh Chapchar Kut Souvenir Editorial Board an din a, Chapchar Kut hman dan tur tha zawk a awm theih beiseia Art & Culture Department-in inrawnkhawmna (consultation meeting) a buatsaih atanga rawtna lut te chu Programme Committee lamin lo thlir se an ti a ni.

Chapchar Kut 2025 hman nan hian sawrkar chuan budget-ah cheng vbc. khat a dah a, Department te chu Chapchar Kut kaihhnawih hmalakna an neihah an Department sum a lo thawk (convergence) tawh tura beisei niin Kut sponsor hi a theih ang anga zawn leh nise an ti bawk. Hei bakah hian Chapchar Kut 2025 thupui atan ‘Zo nun ze mawi - Hawihhawmna’ tih chu thlan a ni bawk.