PM SHRI School te intihsiakna lawmman sem a ni

Ministry of School Education-in Mizoram Samagra Shiksha hnuaia PM SHRI School te tana ni 25 chhunga tihtur hrang hrang a ruahman atanga an intihsiakna lawmman chu nimin khan sem a ni.

He Intihsiakna lawmman semna hun School Education Complex Conference Hall-a neih hi School Education Director leh Mizoram Samagra Shiksha-a State Project Director Lalsangliana chuan a hmanpui a, Education Department chu Mizoram hmalam hun siamtu a ni a, thawktuten thang lian zel tura tan lak a ngai a ni, a ti a. Department lian ber a ni a, a lian zel dawn tih sawiin, Officer te leh thawktuten an hna theuhah quality ngaih pawimawh a tul thu a sawi a. School Education Department-in hmun hrang hranga Civil Works a thawh te chu vil nguna endik thin a tul thu leh thawktute chu inthlahdah lova tan mar reng a pawimawh thu a sawi bawk.

PM SHRI School te tan hian October 14-17,2024 chhung khan District Level Competition neih a ni a, State Level Competition chu October 21-23 chhung khan neih leh niin State Level-ah hian PM SHRI School 24 an tel a, a pumpuia School titha ber chu PM SHRI Govt. Rabung PS-I Khawzawl te an ni a, pahnihna PM SHRI Govt. Chanmari Model PS Aizawl leh pathumna PM SHRI Lorrain English School Siaha leh PM SHRI Govt. PS-I Hnahthial te an ni.

Heng bakah hian activities tina pakhatna theuh thlan ni bawkin Debate-ah PM SHRI Govt. Chanmari Model PS chu pakhatna an ni a, Quiz-ah PM SHRI Govt. PS-I Hnahthial; Creative Arts-ah PM SHRI Lorrain English PS leh Sports-ah PM SHRI Govt Rabung PS-I te chu pakhatna an ni bawk.