Larsap-in C. Zâma lehkhabu ziah 'The Escape' tih a tlangzarh
Directorate of I&PR Lianchhiari Run-a tlangzarhna hunah Larsap General (Dr) Vijay Kumar Singh chuan C. Zâma'n a thil hriat leh tawnhriatte tha taka chhinchhiaha lehkhabu a siam chu fakawm a tih thu a sawi a. Thangtharte hriat atana Mizo chanchina thil thleng pawimawhte ziaka dah zel a tul thu sawiin, “Hun a kal zel anga Mizo chanchin ziahna lehkhabut e hi an la hlu zual deuh deuh dawn a ni,” a ti a. Hun engemawchen ram buaiin a chim hnuah Mizoram chu tunah chuan State ralmuang, hmasawn leh ziak leh chhiar thiam vekna kan nih tak thu sawiin, “Midangte aiin tlai hret mah ila, remna leh muanna hrinchhuah hamthatna hrang hrang kan nei a, hei hian hmasawnna rahbi thar a rawn thlen a ni,” a ti. Larsap chuan hmasawn zel turin hawiher tih zau leh mahni awmhmun atanga chet chhuah a tul thu sawiin, “Hmasawn turin midangte nen kan inpawh-tawn a tul, hmundang atanga kan thil zir leh tawnhriat tha ber berte hi kan State tihhmasawn nan kan hmang tangkai thei a ni,” a ti bawk.
He hun hi ICFAI University, Mizoram-a Vice Chancellor, Prof. (Dr.) Ginlianlal Buhril chuan kaihruaiin lehkhabu ziaktu C. Zâma, Deputy Chief Minister hlui Tawnluia leh Ex-MNA te atangin an tawnhriat ngaihthlak a ni a. Book Cafe neitu Vanlalruata Ralte chuan lehkhabu thlirlawkna hun a hmang a ni.
‘The Escape’ tih lehkhabu-ah hian Mizoram in zalenna a sual hun lai kum 1966-1986 inkara thil thleng leh tawnhriatte tarlan a ni a. Phek 174 a chhah niin bu khat hi Rs 200/- man a ni.