Olympic discipline ni lo te pawhin sawrkar atangin Incentive an dawng ve thei tawh dawn

Sports Minister Lalnghinglova Hmar chuan Olympic discipline ten sawrkar atanga Incentive an dawn ang za a sawmnga (50%) zel Olympic discipline ni lo ten an dawng dawn tih a sawi.

October thla-a Asian Arm Wrestling International Cup-a Mizo infiammi Medal lo hawnte lawmpuina hun nimin-a a Pisa-a buatsaih ah Sports Minister Lalnghinlova Hmar chuan infiammite tan Sports Incentive Cash Award kalpui dan chu siamthat a nih tur thu a sawi a. Olympic huanga infiamna chauh ni lovin Olympic Sports discipline ni lote pawh telh an nih tawh tur thu a sawi a. “Kum li danah Olympic huanga infiamna telh thinte hi tihdanglam a ni ve thin a, hei vang hian Olympic Sports Discipline nghet a awm theih loh avangin Mizoram State Sports Council in Association 33 a enkawl mekte pek vek theih dan hi sawrkar chuan a ngaihtuah ta a ni,” a ti a. Incentive pek dan tur hi sawifiahin, “Olympic discipline ten sawrkar atanga Incentive an dawn ang za-a sawmnga (50%) zel Olympic discipline ni lo te hian an dawng ve dawn,” a ti bawk.

Infiammite lawmpuina leh an hamthatna ngaihtuah chungchang ah Sports Minister chuan sawi belhin, “A tir atangin MAWA bakah infiammite nen kan inbepawp reng a, mipui lamin thawm lian tak nena han rik hluai kan beisei nghal deuh. Mahse sawrkar kalphung anga kal chuan thil tih nghal zung zung theih a ni lova, kalphung leh danin a phal angte zirchian niin ngaihtuahna kan seng zel a ni. Hna nghet chungchangte pawh an hlawhtlinna neih san zawng in a phak dan ang zelin zirchianna kalpui tan a ni tawh,” a ti a. Mizoram in kum tawpah International Level Arm Wrestling inelna a thlen tur thu pawh puangin, kumin December thlaah Aizawl, Mizoram-ah ngei Pro Panja Mega Match Mizoram tih inelna neih a ni dawn a, hetah hian khawvel huap Arm Wrestler tha te lo kalin, Mizo Arm Wrestler te nen an inhmachhawn tur thu a puang a ni.

October 19 atanga 26, 2024 chhunga Mumbai-a Asian Arm Wrestling International Cup neihah Mizoram atangin Denic Lalruattluanga chuan Senior Men kg 80 huangah Gold Medal a la a. Benjamin Lalawmpuia chuan Senior Men kg 100 huangah Silver Medal la in, Vanramnghaki chuan kg 80 hmeichhe huanga ding leh vei lam inelhah Silver Medal ve ve la in, Para Women-ah Bronze a la bawk a ni.

Nimin-a he hun hman ah hian India rama Arm Wrestling League lian, Pro Panja League neitu Parvin Dabas leh PAFI President Preeti Jhangiani te pawh telin, Parvin Dabas chuan, “Kan infiammite, Denic-a leh a thiante mipuiin an lo lawm dan leh milar an nih tawh dan ka hmuh hian ka lawm a, Arm Wrestling in hma a sawnzia ka hmu,” a ti a. Mizoram sawrkar in an lo dawnsawn dan ah lawmthu a sawi bawk a ni.