Chief Minister hovin Sericulture Department hmalakna thlirletna hun hman a ni
Sericulture Department hmalakna thlirhona hunah hian Chief Minister Lalduhoma chuan Viksit Mizoram 2047 tihlawhtling turin kawng hrang hrangin hma an la mek tih sawiin, “Tuna loneitu tam takin hma an lak tawhna Sericulture lamah pawh hian a theih ang anga hmalak a tha kan ti a. Mizoram hi Silk tharchhuaktu State lian tak kan nih theih nan Project lian tham deuh tak kalpui a thain kan hria a ni,” a ti a. “Chak zawka hna in thawh theih nan in harsatnate hriat kan duh a, Review Meeting kan han ko a. District Officer-te pawhin inthlahrung lovin in hnathawhna hmuna in mamawhte sawi ula, inpawh takin engkim kan sawi dawn nia,” tiin Meeting koh chhan a sawi a. Sericulture Minister Lalthansanga chuan Review Meeting a neihpui avangin Chief Minister chungah lawmthu a sawi a. “Sericulture-ah kan ramin theihna a nei tih kan hriat avangin kan tang hle a. Department pawh a nung thar hle a, thawktute leh kan farmers te pawh kan phur tlang hle a ni,” a ti bawk.
He hunah hian Sericulture Department hmalakna hrang hrang tarlan niin Sericulture Farmers mi 7040 an awm mek a, kuminah hian September thla thlengin Cocoon Metric Ton 53.8260 an tharchhuak tawh a, Cocoon hi tunhma chuan sawrkar hian kg khat Rs. 300 in a Pangnang khawitute hnen atangin a lei thin a. Tunhnaiah sawrkar chuan Rs. 350-ah a tipung a. Central Sector hnuaiah Eri Coccoon & Yarn Production Cluster Development chu Aizawl, Lunglei leh Saitual District-ah te kalpui mek niin loneitu 120 a huam dawn a. Central Sector hnuaiah tho hian Integrated Muga Sericulture Development in Mizoram chu Aizawl leh Saitual District-ah chhungkaw 70 huamin kalpui mek a ni a, Central Sector hmang vek hian Aizawl leh Saitual-ah hian Comprehensive Mulberry Value Chain Enhancement Project kalpui mek niin loneitu 60 a huam a ni.
Thawktu indaihlohna chungchang pawh he hunah hian sawi niin indaihlohna nasa zual hnawhkhah chungchang, a bik takin Rearrer lak an nih thuai theih nan Recruitment Rules siam ngaite siam that ni se an ti a. Post dangte pawh proposal thehlut tura tih an ni.
Handholding hnuaiah Phase 1-ah CM Special Package hmu mi 30 leh Loan hmu mi 9 an awm a. Phase 2-ah CM Special Package hmu 29 leh Loan partner pakhat an awm bawk a. Loan hmutute hian tha takin an loan hi an rul hlawm a. Handholding hmu 70% ten Cocoon an thar chhuak tan (production stage) tawh a. An zinga pakhat Hrangngaihkimi, Tawipui North-II chuan hna a thawh that avangin ‘CM Award 2026’ a dawng a. Lalchhandami, Tuipui D, Hnahthial District chu September 20 khan Central Silk Board chuan an 77th Foundation Day-ah ‘Best Achiever Award in Eri Adopted Seed Rearer’ an hlan bawk a ni.