MPYCC in RT-PCR Test man tihhniam phutin Private damdawi In-ah RAT phalsak an duh

Mizoram Pradesh Youth Congress Committee (MPYCC) chuan Mizoram sawrkar chu RT-PCR Test man tihniam tura an phut thu sawiin, Mizoram-a Private damdawi In ah te RAT Test phalsak vat an duh thu an sawi.

Nimin-a Aizawl Press Club-a thuthar thehdarhtute an kawmna hunah MPYCC President, Dr. Lalmalsawma Nghaka chuan Mizoram-ah India ram leh rampawn ang bawkin COVID-19 a pung chho zel dawn nia a lan thu sawiin, COVID-19 chungchanga kan dinhmun dik tak hriat theih nan a tam thei ang ber 'test' a pawimawh zia mithiam ten an sawi thu a sawi a. MPYCC chuan India ram hmun hrang hranga Private Laboratory-te an biak kual thu sawiin, Mizoram Sawrkar-in RT-PCR etc. COVID-19 test man a bithliah aiin an rate hi a hniam hle tih an sawi.

Mizoram sawrkar chu a vannei hle nia sawiin MPYCC Presdient chuan, “ZMC-a RT-PCR khawl te pawh Hauva & Sons-te donate niin, a khawl pakhat zawk pawh hawh a ni a. Lunglei District tan pawh Pu Zodintluanga, MLA, MPCC Treasurer & CLP Leader zahawm takin ama Fund atangin a donate bawk. Hei bakah hian TrueNat khawl an hman pawh Mizoram Sawrkarin thildang test nana a lo neih sa a ni,” a ti.

MPYCC President chuan Chief Minister's Relief Fund hman dan tarlan atangin Mizoram District hrang hranga COVID-19 test khawl, Truenat khawl te pawh mipui tlawmngai leh thahnemngai ten CM's Relief Fund an thawhkhawm atanga lei vek nia sawiin, hmanraw dang PPE leh a dangte pawh CM Relief Fund atanga lei a nih thu a sawi a. Hei bakah hian Mizoram sawrkar chu ICMR lamin RT-PCR Test Kit hi a thlawn (Free) in a rawn pe chungin ramchhunga Private Laboratory te aiin test man hi Rs. 2000/- laiin a la tam zawk niin a sawi a, “Supreme Court of India chuan India ram Private Laboratory te chu mipui phurrit tur khawp Covid-19 Test man la lo turin a lo ti tawh a, Sawrkar damdawi In phei chu a thlawna test beisei a ni,” tiin Mizoram sawrkar chu Testing Rate ennawn tur leh a rang lama tihniam tura an phut thu a sawi bawk.

MPYCC President chuan Mizorama Kohhran Hospital leh Private Hospital ten COVID-19 kai nia rinhlelh (suspect case) an neih te an lo enfiah theih nan The Mizoram Epidemic (COVID-19) Regulation, 2020 chu siamthat tul an tih thu pawh a sawi a, Mizoram Sawrkar in RAT Test Kit, CM's Relief Fund kaltlanga a lei chu SD Biosenor siam a nih thu leh Rs. 450/- vel zelin Test Kit pakhat a lei a nih thu a sawi bawk a. “RAT Test kit hi Assam-ah chuan Sawrkar in a thlawnin an pe thei a, Mizoram-a Private Hospital-te hian a thlawn pawha beisei ngam lovin a man chawia 'test' an dilna hi a rang thei ang berin tih hlawhtlin sak se, mipuite him nan a pawimawh takzet a ni,” a ti bawk.