Latest News

Serchhip khawpui Eng pekna tichangtlung mek; Chhimlam Eng pekna, 132KV Line thar peihfel a ni tawh


Serchhip Bukpui-a 132kV Sub-Station atanga Serchhip khawpui chawmna tih changtlunna tura 12MVA Transformer rawn phurh thlen chu nimin khan a dahna tura dahfel niin he khawl hi hman a nih hunah chuan Transformer chhe palh a awm changa khawpui chhung Power Supply inpekchhawk ngai thin chu sutkian theih beisei a ni.

P&E Serchhip Division-a thawktute hnen atanga thu kan dawn danin Serchhip in Zuangtui atanga Kawlphetha a hmuh, 132kV Line hi Serchhip Bukpui Sub-Station a rawn thlen hnuah Transformer pahnih, 6.3MVA leh 12.5MVA te hmangin Serchhip khawpui leh District chhung khaw hrang hrangte chawmna atan pekchhuah leh a ni a, 12.5MVA kan hman mek hian Serchhip khawpui chhungah New Serchhip Area leh PHE Pump House bakah khaw thenawm te chawmin 6.3MVA Transformer hian a bak khawpui chhung leh khaw thenawm te a chawm bawk a. Tuna 12.5MVA kan hman mek hian a vaiin chawm thei mah se a chhiat palh hlauh chuan 6.3MVA hian a vaia a chawm theihloh avangin a chhawka Eng inpek a ngai thin a. Amaherawh chu tuna 12.5MVA Transformer thar bun a nih leh takah hi chuan khawl lamah harsatna a ruala a awm vek a nih loh chuan a rualin Serchhip Transformer in a chawm zawng zawngte chu Eng pek theih a ni tawh dawn a ni.

He khawl hi August 1, 2020 khan Gujarat atangin Serchhip panin rawn phurh a ni a, Serchhip rawn thlenpui a nih hnuah a hlanthlakna tur khawl, Ton 24 zo tur a awm mai loh avangin hun engemaw chen dah a ni tawh a, Darlawng-a Oil zawngtute khawl lian chu hawh niin NH. 54 laih mek avangin a rawn thleng mai thei lova, hemi hnu nimin khan khawl hlui hi a awmna sawnin khawl thar hi dahluh a ni a, harsatna dang a awm loh chuan chawlhkar khat hnu velah hman theih an beisei tih thawktute chuan sawiin, hemi hma hi chuan tuna 12.5MVA Transformer awm mek hmang hian kawlphetha hi pekchhuah a nih dawn thu an sawi bawk a. Serchhip Bukpui Sub-Station a an hman thin 6.5MVA Transformer chu East Lungdar-ah hman tura ruahman a nih thu leh hun remchang ah dahchhoh tura ruahman a nih thu an sawi bawk.

P&E Serchhip Bukpui Sub-Station Sub-Division-a SDO, Otto K. Lalchhuanawma chuan P&E Department hmalakna thenkhat pawh sawiin, tunhmaa Zuangtui atanga Mizoram chhimlam Power pekna, 132 KV Line pakhat chauh awm thin chu World Bank Road lamah 132KV Line siam belh a nih thu leh tunah chuan hman theih tura peihfel a nih tawh thu a sawi a, he Line hi hman a nih hunah chuan Zuangtui leh Bukpui inkara Line chhia a awm changa Mizoram chhim lam Eng pekna kawnga harsatna awm thin pawh sutkian theih a nih tawh dawn thu leh Lunglei lam atangin Serchhip Bukpui-ah pawh Eng hi rawn peklet theih a nih tawh dawn thu a sawi.

Hei bakah hian Mizoram khaw-chhak lam Eng pekna chhe palh a awm pawha Serchhip kaltlanga Khawzawl-a Eng pekna, 33KV Line awm mek pawh 132KV Line-a thlak tura hmalak mek a nih thu pawh SDO chuan a sawi a, hei pawh hi hun reilote ah zawh theih an beisei thu leh hei hi zawhfel a nih hunah chuan khawchhak lam Eng pekna Line chhia a awm pawhin dan pangngaia Power pek theih a nih tawh dawn thu a sawi bawk a ni.

Comments

Popular News (Last 30 Days)