Iron Rod zuartu ten Electronic Weighing Machine hmang

Serchhip District chhunga Iron Rod zawrhna dawr hrang hrangte chuan Electronic Weighing Machine an hmang vek tawh.

Serchhip-a Legal Metrology thawktute hnen atanga thu kan dawn danin tunhnai khan Mizoram sawrkar-a Legal Metrology Controller chuan thuchhuah siamin mipui ten Iron Rod buk tling ngei an lei theihna turin Iron Rod Dealer te chu September, 2020 ralhma ngeia Electronic Weighing Machine hmang vek turin a ti a. Hemi bawhzuina atan hian tunhnai khan Serchhip-a Iron Rod zawrhna dawr hrang hrangte chu Legal Metrology Enforcement Staff ten enfiahin Rod bukna atan hian Electronic Weighing Machine hi an hmang vek tih an sawi a ni.

Legal Metrology Controller thuchhuah chuan Iron Rod hi a len lam leh a sei lam mil turin Bureau of Standard chuan a rih lam Standard a siam tih pawh tarlangin, hei hi a siamchhuahna (Manufacturing) tana tih a nih thu leh Iron Rod hralh leh leina atan a mal (piece) zat chhiara hman tur a ni lo tih a tarlang a. A hralhchhuahna atan hian Rules 10 of The Legal Metrology (Enforcement) Rules, 2010 in a sawi angin an buk ngei tur a ni, an ti bawk.

Electronic Weighing Machine te hi Section 24 of the Legal Metrology Act, 2009 in a phut angin Aizawl leh District hrang hranga Legal Metrology Office-ah hman hmain an endik tir hmasa tur a ni, a ti a. Iron Rod Dealer te chuan Electronic Weighing Machine hman tur an lei dawnin a endikna tur atana pawimawh (Calibration Chart) an dil tel tur a ni, a ti bawk.

Comments

Chhiar Hlawhte