Mizoram-ah hri kai 40 hmuh belh leh an ni

/

Darkar 24 kalta chhung khan Mizoram-ah COVID-19 hri kai hmuhchhuah thar mi 40 zet an awm leh a, hri kai zingah hian Mizoram sawrkar-a Health Secretary, H. Lalengmawia pawh a tel a ni.

Niminpiah khan ZMC RT-PCR Laboratory-ah Sample 995 enfiah niin heng atang hian COVID-19 hri kai 35 hmuhchhuah an ni a, heng te hi Aizawl District mi vek niin mipa 21 leh hmeichhia 14 an ni a, heng mite hi Aizawl khawpui Veng 14-a hri kai hmuhchhuah tawhte nen lo inkawmhnaih atanga hri kai te an ni a, Durtlang Veng tam berin mi 12 zet hri kai hmuhchhuah an ni a, Govt. Complex-ah mi 5 leh Bawngkawn South leh Bethlehem Vengthlang-ah mi 3 ve ve hri kai hmuhchhuah an ni bawk.

Niminpiah vek khan District hrang hranga TrueNat khawl atangin hri kai mi 3 hmuh an ni bawk a, Hnahthial District-ah mi 2 leh Lunglei District-ah mi pakhat niin State pawn atanga rawn haw an ni a, Rapid Antigen Test hmangin COVID-19 positive 2 hmuhchhuah ni bawkin Lawngtlai District leh Khawzawl District mi niin State pawn atanga rawn haw an ni bawk.

Niminpiah a hri kai hmuhchhuah zingah hian Mizoram sawrkar-a Health Secretary, H. Lalengmawia pawh a tel a, ngaihtuahawm erawh a ni lo thung a. Taksa-a hri kai lanchhuahna neilo niin amah bakah hian a Pisa (Personal Branch)-a thawk mi 3 te chuan hri hi an kai bawk. Tun tuma hri kai hmuhchhuah zingah hian Durtlang Synod Hospital-a thawk Dr. Vanlalchama pawh a tel bawk a, hei vang hian Durtlang Hospital OPD pawh nimin atang khan khar nghal a ni bawk.

India-a COVID-19 hri kai nuai 49 an tling ta :

India rama COVID-19 hri kai hmuhchhuah chu nuai 49 an tling ta a, hri kai zinga nunna chan pawh mi sing riat an chuang tawh bawk. Ministry of Health & Family Welfare chhinchhiahna atanga a lan danin darkar 24 kalta chhung khan India rama Sample enfiah 10,72,845 atangin COVID-19 hri kai 83,809 hmuh leh an ni a, heti hian India ramah Sample enfiah zawng zawng chu 5,83,12,273 niin hri kai hmuhchhuah zawng zawng chu 49,30,236 an tling tawh a, India rama Sample enfiah atangin zaa 8.45 te chuan hri an kai a ni.

Darkar 24 kalta chhung khan India rama hri kai hmuhchhuah zingah mi 79,292 te chu enkawl dam niin India rama hri kai enkawl dam chu 38,59,399 an tling tawh a, hri kai atanga chhutin enkawl dam hi zaa 78.28 niin tunah hian hri kai enkawllai 9,90,061 an la awm bawk a ni. Darkar 24 kalta chhung khan India rama hri kai zingah nunna chan 1,054 an awm leh bawk a, tun thlenga India rama hri kai hmuhchhuah atanga nunna chan chu 80,776 an tling tawh bawk a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »