Latest News

Sawrkar ruahmanna siam te zawm turin chah nawn

Disaster Management & Rehabilitation Department chuan COVID-19 laka mipuite inveng chunga nunphung khaihlak lutuk lova kan kal zel dan tur ruahmanna Sawrkar in a siamte chu tha taka zawm turin mipuite an chah.

Hemi chungchanga thuchhuah an siamah Mizoram Sawrkar chuan COVID-19 hripui leng mek karah Mizo-ram mipuite eizawnna leh chetvelna kawnga hmalak dan tur chungchangah thupek leh inkaih-hruaina te chu kan hun tawn ang zelin a chhuah thin tih tarlangin, Central Sawrkar-in thupek a chhuah ai pawha khauh hret zawk zela ruahmanna te pawh siam a ni tih an tarlang a.

Chutih karah chuan Aizawl khawpui chhunga Veng thenkhatah leh District thenkhat ah Mizoram Sawrkar thupek kalh zawng leh mipuite nitin khawsakphunga harsatna nasa tak thlen thei zawnga hmalakna a awm tih hriat a ni tih tarlangin, Sawrkar hriatpui lova Veng emaw, khawbil inkharkhipna thupek chhuah hriat tur a awm nual thu leh, chhungkaw thenkhat, in quarantine mekte pawnlam atanga Tala-a kalh-hnan thu hriat tur a awm zeuh zeuh bawk tih an tarlang a. Hei bakah hian Veng thenkhatah Sawrkar Office lo khar thawm leh Sawrkar hnathawk, Sawrkarin duty tura a ruatte pawh an duty hlen chhuak thei lova LLTF/VLTF thenkhatin an siamthu leh hei hi Sawrkar chuan pawi a ti hle tih an tarlang a, COVID-19 laka mipuite inveng chunga nunphung khaihlak lutuk lova kan kal zel dan tur ruahmanna Sawrkarin a siamte chu tha taka zawm turin an chah nawn leh a ni.

Sawrkar-in Mizoram pum atana hman tur Order a chhuah piah lama District emaw, Khaw/Veng bil atana a bika hmalak tulna riau a awma nih erawh chuan LLTF/VLTF te’n an District Deputy Commissioner hnenah an thlen anga, a tul anga hmalak a nih tur thu an tarlang bawk.

Comments

Popular News (Last 30 Days)