India ram University-ah MZU in 58-na hauh phak

Outlook chanchinbu in kumtin-a an tih thin anga kumina zirna In tha a thlannaah Mizoram University chu India rampuma University tha 58-na a ni a, Central University bikah chuan 11-na a ni.

India rama University tha ber atana Outlook-in a thlan chu Indian Institute of Science (IISC), Bangalore a ni a, Jawaharlal Nehru University (JNU), New Delhi-in dawtin JNU hi Central University bik zingah chuan University tha berah an thlang a, MZU chu 11-na niin, Mizote luh tamna North Eastern Hill University, Shillong chu 10-na a ni thung.

Central University zingah hian hmarchhak biala University zingah Tezpur University, Assam sang berin pasarihna a ni a, NEHU leh MZU-ten an dawt a. A tha zual 25 zingah hmarchhak State atangin Assam University, Silchar chu 15-na niin, Tripura University, Agartala chu 20-na a ni a, Sikkim University, Gangtok chu 21-na niin, Central Agricultural University, Imphal chu 25-na a ni bawk. Hetihlai hian, University zawng zawng zingah chuan hmarchhak State-a tha bera puan chu Gauhati University, Guwahati (State University) a ni thung.

State University zingah Jadavpur University (JU), Kolkata chu pakhatna a ni a, Calcutta University-in dawtin JU hi a pumpuiah pathumna a ni. Technical zirna bikah Indian Institute of Technology (IIT), Madras, Chennai chu pakhatna a ni a, Medical zirna ah All India Institute of Medical Sciences (AIIMS), New Delhi chu pakhatna a ni bawk.