Mizoram-ah COVID-19 hri kai In lama inenkawl theih turin ruahmanna siam a ni

COVID-19 hri kai te enkawl dan chungchang ngaihtuahin nimin khan Health Minister, Dr. R. Lalthangliana hovin thutkhawm hmanhmawh neih a ni a, COVID-19 hri kai, an taksa a natna langchhuaklo te In lama inenkawl dan tur ruahmanna duan chu thlirhovin Chief Minister hnenah he ruahmanna thar hi thlen nghal nise an ti.

SAD Conference Hall-a he thutkhawm ah hian Health Minister, Dr. R. Lalthangliana chuan kan dinhmun hriaa Kohhran leh YMA-te rawn penchhuaka an hmunhmate CCC atana hman an phal belh zel chu lawmawm a tih thu sawiin, Mizo nih nawmna leh Kristian nih nawmna a tilang a ni, a ti a. Hemi chungchangah hian thinlung taka a lawmthu sawiin, tun dinhmunah a theih chin chinah Sawrkarin CCC atana a ruahman lawk sa te kan hman mekte a khah hnu a indaihlohna a thleng a nih pawhin Kohhran leh YMA zarah kan thla a muang hle a ni, a ti bawk.

He hunah hian Mizoram-a COVID-19 hri kai hmuhchhuah an pun zel avangin ruahmanna thar hi siam a ni a. A bika enkawl ngailo COVID-19 positive, an taksa a symptoms lang chhuak silo, Registered doctor/ Medical Practitioner ten Asymptomatic an ni tih an hriatpuite chu an dinhmun a zirin mahni In lama inenkawl phalsak mai ni se an ti a ni. Hemi tur hian In lama inkhunghranna Room leh Bathroom hrang, midangin an tawmpui loh nei, an chenna Village/Local Level Task Force ten an remtihpui hnuah leh Health & Family Welfare Department in an hmunhma te uluk taka an endik hnuah in lama inenkawlna tlak ni a an pawm sak chuan, in lama inenkawl zui hi phalsak nise an ti a. Heng Home Isolation a awmte chenpuite pawh uluk taka inenkawl tura tih niin an zawm tur kimchang taka ruahman a ni a, Home Isolation a inenkawlte hi darkar 24 chhunga vil rengtu an awm a tul bakah, Health & Family Welfare Department in uluk takin an vil reng dawn a ni.

Home Isolation hi intihluihna ni lovin, In lama inenkawl thei ni a inhria te tana tih a ni a, hemi atana zawm tur dan leh hrai chi hrang hrang siam a ni bawk a. Chief Minister remtihna lak a nih hnuah sawrkarin Notification chhuahin hman tan nghal a ni ang. Aizawl khawpui bikah COVID-19 vei an pun chak em avanga Ambulance indaihlohna a nasat tawh avangin hemi chungchanga harsatna sutkian a nih theihnan ruahmanna siam tura tih a ni bawk.

Comments

Chhiar Hlawhte