Mamit-ah TrueNat Laboratory hman tan a ni ta

Mamit District Hospital-a TrueNat Laboratory chu hman theiha peihfel niin nimin khan hman tan a ni.

Mamit District Hospital-a TrueNat Laboratory hi Mamit District Bawrhsap, Dr. Lalrozama, IAS chuan hawngin tunlai hripui avanga mipuite kan buai laia COVID-19 hrik hmuhchhuahna khawl an District-in an nei ve ta chu lawmawm a tih thu a sawi a. Thawktute thahnem ngaihna leh sawrkar chungah lawmthu a sawi bawk. He huna tarlan danin Mamit-a TrueNat Laboratory-ah hian vawikhatah Sample pali zel test theih a ni a, Sample vawikhata lak endik nan hian darkar 1 leh minute 45 atanga darkar 2 vel hman a ngai a ni. Truenat Laboratory khawl thar-ah hian a vawikhat nan nimin khan sample 16 enfiah nghal a ni bawk. Ruahman lawk ang chuan Sample hi Thawhlehni, Ningani leh Inrinna-ah te test tura ruahmanna siam a ni a, tul bik thil leh mamawh dan a zirin hei hi siam danglam leh theih a nih bakah Emergency thilah chuan engtik lai pawha test theih a nih thu tarlan a ni bawk.

Mizoram sawrkar chuan COVID-19 hri leng mek avang hian District tin Hospital-ah TrueNat Laboratory hi din turin ruahmanna a siam a, Khawzawl District tihloh chu hman tan vek an ni tawh nia thudawn a ni.