Lenkawl

Inrinni khan ramchhung hmun hrang hrang ah Lok Adalat thutkhawm neih niin Serchhip District-ah pawh Lok Adalat-ah hian thubuai 143 ngaihtuah a ni.

Nimin tlai thleng khan Serchhip District-ah COVID-19 hri kai enkawllai mi 20 an awm mek.

Mizoram khawpui fai inelna neih zawh takah Serchhip chu District khawpui fai thlanna ah 5-na a ni. Mizoram khawpui fai ienlna, 'Mizoram Cleanliness Competition 2021' result hi Zirtawpni khan puan niin Sswachhata Ranking puan nghal a ni a, District khawpui zingah Saitual chu 1-na niin Lunglei leh Mamit ten an dawt a, an hnuaiah hian Khawzawl, Serchhip, Kolasib, Hnahthial, Champhai, Lawngtlai leh Siaha te an awm a ni. Urban Town zingah Biate chu sang berin Ngopa leh West Phaileng ten an dawt a, Serchhip District atangin Thenzawl chu 5-na niin North Van-laiphai chu 12-na a ni thung.

COVID-19 hri leng avanga Serchhip District Hospital-a naupang te enkawlna tur bik, Paediatric Ward sak mek chu a rang thei ang bera zawh tum niin April thla tawp atang khan ngawrh taka hna thawh mek a ni.

Hmuifang leh Chawilung inkar kawngpui PMGSY sum hmanga thawh chu kum hnih a tlin hnuah siamthat hna thawh a ni dawn a, he kawngpui siamthat hna hi Cement Work hmanga thawh tur a nih avangin naktuk May 17, 2022 atanga May 23, 2022 chhungin helai kawng hi lirthei zawh theihloh tura khar a ni ang.

Mizoram Youth Commission Chairman Dr. Vanlaltanpuia MLA leh New Delhi atanga lo kal Vision IAS aiawhte chuan Zirtawpni khan Chief Minister Zoramthanga chu a Pisa-ah hmuin Super IAS 40 programme hnuaia MYC in New Delhi a Mizo thalai Full Sponsorship-a a tirh tur chungchanga thawhhona chungchang an sawipui.

Myanmar ram buai avanga Mizoram-a ral-tlan luh tamna Champhai District-ah chuan sawrkar School, Primary leh Middle School-a zirlai za zela 7 chu raltlan naupangte an ni tih Champhai SEDO Office chhianchhiahna ah tarlan a ni a, chhinchhiahna atanga a lan danin kumin 2022-2023 Academic Session-ah hian Champhai District-ah hian Primary leh Middle School-ah zirlai 20,083 inziaklut awm tawhin heng zinga 1415 te chu Myanmar atanga rawn raltlan te an ni a, raltlan zirlai naupang te hi Primary School-ah 1020 leh Middle School-ah 395 niin heng bakah hian High School-ah zirlai 143 an awm bawk a ni.

Mizoram Larsap Dr. Haribabu Kambham-pati chuan Mara Autonomous District Council (MADC) Chairman thlan hun atan tunkar Nilaini, May ni 18, 2022 a ruat a, MADC Chairman inthlan chuh tumte tan Thawhlehni thleng hming pekluh theih a ni ang. MADC official-te’n an sawi dan chuan Chairman ni tur chuan MDC 13 talin an vote tlin a ngai a, chuti zat vote a hmuh loh chuan sawrkarna siam thei an awm lo tihna a ni anga, Larsap in Administrator ruatin MADC chu a enkawl ang.

Mizo Students' Union (MSU) Federal Meeting 2022 chu Zirtawpni zan khan Thingsai Community Hall-ah neih niin Higher & Technical Education Minister Dr. R. Lalthangliana chuan a hmanpui a, he huna kalkhawmte chu Hnam rilru pu-a a taka kan hnam ziarang tihlan zel tum turin a chah a. Mizote chu la tlem hle mah ila, hnamdang tluk lohin kan insiam thei tih sawiin, “Tih takzeta zirlaite hian hma kan lak chuan India ramah nasa takin kan inpho chhuak thei ang. Vai tih theih chu kan ti ve thei, All India Service lamah te nasa takin tan la thar ang u,” a ti bawk. MSU Federal Meeting 2022 hi MSU General Secretary Samuel Zoramthanpuia chuan kaihruaiin hruaitu dang te pawhin thu an sawi a ni.

Nimin tlai thleng khan Mizoram-ah COVID-19 hri kai enkawllai mi 262 an la awm a, tunhnaiah hri kai enkawllai hi tlem in an pung ve leh hret a ni.

Mizoram Governor Hari Babu Kambhampati chuan Tourism Department hmalakna chu a phurpui thu sawiin, Mizoram tan hna tha tak an thawk nia a hriat thu a sawi.

Mizoram Pradesh Congress Committee (MPCC) thupuangtu Dr. Lalianchhunga chuan Inrinni khan Aizawl Press Club-ah thuthar thehdarhtute kawmin Mara Autonomous District Council-a thuneihna chan ngawr ngawr chu an tum ber a ni lo tih sawiin, sawrkar ngialnghet din chu an tum ber (No. 1) a ni tih a sawi a. MADC inthlanna neih zawh takah Party mal-a sawrkar siam thei an awm loh avangin BJP leh MNF Party chuan sawrkarna siampuiah an sawm ve ve tih sawiin, “Amaherawhchu, Congress party thuneitu sang, Political Affairs Committee-in ngun taka a ngaihtuah hnuah eng party mah thawhpui loh ni se a ti ta a ni,” tiin Congress MDC pali (4) ten party thuneitu sang thutlukna an zah thiam chu chhuanawm an ti hle tih a sawi bawk.

Chief Minister Zoramthanga chuan Mizoram-a Engineer-te chu Mizoram hmasawnna atan an thiamna leh remhriatna te hmang turin a sawm.

Mizoram sawrkar-a Food Civil Supplies & Consumer Affairs (FCS&CA) leh Aizawl Municipal Corporation (AMC) hmalakna in Aizawl Veng pumpuiah Gas Home Delivery kalpui turin hmalak mek a ni a. Tun dinhmunah Mizoram-a Gas connection awm zat chu 3,25,121 niin, Gas Subsidy a la tawp lova, KYC leh Connection fello ah erawh Subsidy a lut tha lo nia thudawn a ni.

Kumin March thla atanga Mizoram-a Vawk pul hri, African Swine Fever (ASF) a len nawn leh atanga nimin thlengin Mizoram-ah Vawk 2,836-in a thih phah leh tawh a. Serchhip District-ah chuan tun thlengin ASF vanga Vawk thi hi a la awm leh rihlo nia hriat a ni.

Chhungkaw lam Programme pawi-mawh avangin tunkar atan Vawiin bak hi LENKAWL a rawn chhuak thei dawn lova, harsatna dang a awm loh chuan karleh Thawh-tanni atangin Dan pangngaia rawn tih-chhuah leh tum a ni ang.

Mizoram-a Wrestling (Inchai) inelna lian ber, 5th Inter-District Mizoram Wrestling Championship, 2022 leh Mizo Inchai Tittle Fight Challenger zawnna chu karleh May ni 17-19, 2022 chhung khian Serchhip Indoor Stadium-ah neih a ni dawn.

Eirawngbawlna Gas la tur ten Gas semna tur Point siam-ah la lova anmahni In-a Gas semtu ten an pekna tur, LPG Home Delivery System chu Serchhip District-a a hmasa ber atan Serchhip P&E Veng-ah kalpui a ni dawn a, FCS&CA Department Director Ramdinliani chuan nimin khan a hawng a ni.

Nimin khan District Vector Borne Disease Control Programme (DVBDCP) hmalakna in Serchhip Mat Phai Zau hrang hrangah Malaria dona atan beihpui thlak a ni a, he hunah hian ramriak mi te tan DDT kah te, damdawi hmanga Thosilen chiah leh Malaria hrik pai an awm leh awm loh enfiah te neih niin thisen enfiah zingah Malaria hrik pai hmuhchhuah an awm lo a, Sikserh Malaria chungchang inzirtirna pawh a theih anga neih a ni bawk. Nimin-a Malaria chungchanga hmalakna ah hian Serchhip Mat Phai-a Zawlpui, Zuangleng, Thliarpui leh Chamdur Zau-ah te Ser-chhip atangin Health Department-a thawktute an kal a ni.

Serchhip District-ah COVID-19 dinhmun in ziaawm lam a pan ve hret hret zel a, tun din-hmun ah hri kai enkawllai khaw 7-ah an la awm mek a ni.