Kumin ah ASF vangin Vawk 2,836 thi tawhin Serchhip District-ah Vawk thi ala awm lo nia hriat a ni

Kumin March thla atanga Mizoram-a Vawk pul hri, African Swine Fever (ASF) a len nawn leh atanga nimin thlengin Mizoram-ah Vawk 2,836-in a thih phah leh tawh a. Serchhip District-ah chuan tun thlengin ASF vanga Vawk thi hi a la awm leh rihlo nia hriat a ni.

Animal Husbandry and Veterinary Department hotute hnen atanga thudawn kan danin nimin khan Mizoram-ah ASF vangin Vawk 38 a thih belh leh a, heng te nen hian kumin a ASF hri leng avanga Mizoram-a Vawk leh Vawkte thi zawng zawng chu 2,836 tling tawhin nimin vek khan Vawk 115 chu Vawk pul hri darh zel tur ven nan suat belh leh a ni bawk a, heng te nen hian kumin March thla a ASF hri len leh hnu hian a vaiin Vawk 2,373 an suat tling tawh bawk a ni. ASF hi Mizoram District 6-a khua leh Veng 39-ah a leng mek a, Champhai leh Aizawl District-a Vawkvulhtute chu a tuar na zual an ni a. Champhai District-a Farkawn khua chu khaw mala Vawk hloh tam ber niin Vawk 507 a thi tawh a, Vawk 898 suat tawh bawkin ASF vanga thi nia rinhlelh leh finfiah si loh Vawk thi 327 a awm tawh bawk a ni.

Aizawl District-a Darlawn khua chu Vawk hloh hnem ber pahnihna niin Vawk 400 thi tawhin 136 an suat tawh a, Sakawrdai-ah pawh Vawk 296 a thi tawh bawk a, Champhai Bethel Veng-ah pawh Vawk 195 a thi tawh a ni.

Nikum March ni 21 atanga Mizoram-a ASF hri leng tanah khan nikum chhungin Vawk 33,417 a thi a, Vawk 10,910 chu suat niin Vawk thi avanga sum hloh zat hi cheng vbc. 60.82 zet a ni a, Vawk suat zangnadawmna tur hi sawrkar laipui in rawn pe tawh mah se Mizoram sawrkar in a chanve zet a tum ve tur a la pe thei lo ni a thudawn a ni bawk.

Vawk vulhtute chuan kumin kum bula Vawk hrileng thunun ni a puan a nih hnu-ah mi pamham thenkhatin ASF Vawk pulhri lenna State leh thenawm ram atanga Vawk an lakluh avanga Vawk pulhri hi leng nawn leh nia an ngaih thu an sawi a ni.