Aizawl-ah LPG Home delivery kalpui vek tum

Mizoram sawrkar-a Food Civil Supplies & Consumer Affairs (FCS&CA) leh Aizawl Municipal Corporation (AMC) hmalakna in Aizawl Veng pumpuiah Gas Home Delivery kalpui turin hmalak mek a ni a. Tun dinhmunah Mizoram-a Gas connection awm zat chu 3,25,121 niin, Gas Subsidy a la tawp lova, KYC leh Connection fello ah erawh Subsidy a lut tha lo nia thudawn a ni.

Mizoram Consumer Union (MCU) General Secretary A. Lalhmangaihzuala sawi danin Aizawl Veng zawng zawngah Gas Home Delivery kalpui vek tum niin chumi atan chuan tun dinhmunah Pilot Project atan Veng 34 thlan a ni a, Awareness pawh May 19, 2022 thleng neih tura duan a ni bawk. MCU General Secretary sawi danin Home Delivery kalpuina man Rs. 70 zel bituk a ni a, Aizawl Veng pumpuia kalpui theih a nih hunah chuan Rs. 50-ah tihhniam tumna a awm bawk. Pilot project atana thlan zingah Home delivery phur vak lo Veng te pawh an awm nia hriat a ni.

MCU General Secretary chuan LPG subsidy a la tawp lo tih sawiin, tuna subsidy lut zat chu Rs. 144/- a nih thu leh lut thalo te chu mahni Gas Connection leh KYC en fela Agent-te hnena complaint turin an chah a ni. Aizawl khawpui-ah hian Gas Hme Delivery hi kum 2019 atang khan Veng pali- College Veng, Dawrpui, Falkland leh Zonuam-ah te kalpui a lo ni tawh a ni.

Chhinchhiahna atanga a lan danin Mizoram-a District 8-ah Gas Agency 57 awm mekin Conection 3,25,121 a awm mek a, Aizawl District-ah Agent tam berin 25 a awm a, Lunglei District-ah 8, Champhai District-ah 6, Kolasib District-ah 5, Serchhip leh Lawngtlai District-ah 4 ve ve, Mamit District-ah 3 leh Siaha District-ah 2 te a awm a ni.