Serchhip P&E Veng-ah LPG Home Delivery kalpui tur hawnna neih a ni

Eirawngbawlna Gas la tur ten Gas semna tur Point siam-ah la lova anmahni In-a Gas semtu ten an pekna tur, LPG Home Delivery System chu Serchhip District-a a hmasa ber atan Serchhip P&E Veng-ah kalpui a ni dawn a, FCS&CA Department Director Ramdinliani chuan nimin khan a hawng a ni.


Serchhip P&E Veng YMA Hall-a LPG Home Delivery System hawnna ah hian Supply Department Director chuan Mizoram-ah eirawngbawlna Gas Home Deivery System kalpui a ni chho ta chu a lawmawm tih thu sawiin, State dangah chuan kum 1992 atang tawhin an lo kalpui tawh thu leh kum 30 a liam leh hnuah chuan mahni In-ah Pipeline lutin Gas an la tawh tih a sawi a. Mizoram-ah erawh chuan Gas la tura intlar ala ngaih thu leh Gas sem ni-ah chuan nileng-a hun hman a ngai thin tih sawiin, Home delivery-a eirawngbawlna gas sem a ni dawn chu lawmawm atih thu a sawi a ni.

Supply Department Director chuan Aizawl-a Veng thenkhat ah LPG Home Delivery System hi enchhin a nih thu leh hrileng in a tibuai avanga kalpui chhunzawm theih anih loh thu sawiin, chutihrual chuan he hri leng hian a tha zawnga nghawng neiin mahni kawtkai-ah kan mamawh zawng zawng kan lei thei ta tih a sawi a. Hei vang hian eirawngbawlna Gas pawh mahni kawtkai-a sem thei ngei turin Department in hma a la chhunzawm ve zel tih sawiin, Aizawl-a Veng 4 bakah Veng dang 29-ah kalpui tan leh turin hmalakna kalpui leh mek a nih thu a sawi bawk.

Kawng hrang hrangah Mizo ten hma kan sawm em em laiin kan dikna chanvo humhalh kawngah kan hnufual thung tih Ramdinliani chuan sawiin, “Ni sa hnuaiah Gas la tura intlar ala ngai a, mahni kawtkai-a Gas kan lak ve theih tawhna turin mipuiten sawrkar nawr nachang kan hriat a tul,” a ti. Home Delivery ti tuten a buk dik takin an semchhuak tur a ni tih pawh sawiin, a bukna an keng tel thin tur a ni tih sawi a. Delivery charge chungchangah Sawrkar in distributor te a dawr thu leh Rs. 70 chu a bultanna niin Rate Fix bur erawh a la nilo tih a sawi a, a aia hniam te pawhin tihtheih dan ala awm thu a sawi bawk.

Serchhip P&E Veng-a LPG Home Delivery hawnna inkhawm hi MIZOFED Chairman K. Rothangpuia chuan kaihruaiin MIZOFED lam chu Vawiin atanga Hme Delivery kalpui turin an inpeih tih a sawi a. Serchhip District Consumers Association President H. Zonuntluanga pawhin LPG Home Delivery kalpui tur leh eirawngbawlna Gas chungchanga hma an lo lak tawhna te a sawi a, MIZOFED Serchhip Branch Manager FC. Malsawmzuala chuan he ruahmanna an kalpui dan turte a sawi bakah P&E Veng Branch YMA hruaitute pawhin thu an sawi bawk.

Comments

Chhiar Hlawhte