Governor in Tourism Deptt. hmalakna a phurpui

Mizoram Governor Hari Babu Kambhampati chuan Tourism Department hmalakna chu a phurpui thu sawiin, Mizoram tan hna tha tak an thawk nia a hriat thu a sawi.

Governor Hari Babu Kambhampati hian Zirtawpni khan Raj Bhavan-ah Tourism Minister Robert Romawia Royte leh Tourism Official te kawmin Governor chuan he thu hi a sawi a, Tourism Department in Project hrang hrang a kalpui mek te, Central sawrkara project a thehluhte leh hmathar lak an tumna te hriat chian a duh thu sawiin, Mizoram-a Tourism Sector tih hmasawn chungchangah Union Minister of Tourism G. Kishan Reddy a hmuh tawh thu leh a inhawng hle nia a hriat thu a sawi a, hei bakah hian Director General (Tourism) Ganji Kamala Vardhana Rao pawh Mizoramin Tourism Sector-ah sum tam tak a lakluh theih thu leh eizawnna mi tam tak tak a siam theih dan te a sawipui tawh thu a sawi a ni.

Tourism Ministry lam hian Mizoram chhungah Khawthlirna (View Point) 26 NHIDCL an siam tir tur chungchangte pawh an hrilh thu Governor chuan sawiin, he View Point awmna ah te hian Dhaba/Dawrte te, Toilet/Zun leh ek thiarna/Parking te dah tha nia a hriat thu a sawi a, Tourism Department leh NHIDCL te chu hemi chungchangah hian inpawh takin thawkho thei se a duh tih a sawi a. Reiek Tlang chu a lar tawhin tlawhpawhtu a ngah tawh a; a tlawhtute tawmhulna leh zun leh ek thiarna pawh Ramngaw tichhe miah lova siam theih dawn te a awm chuan dap a hun tawh tih a sawi bawk.

Governor Hari Babu Kambhampati chuan NHIDCL hotute chu Ministry of Tourism in hnathawh tur an pekte thawh an tum dan zawtin, State Tourism Department te pawh inrawn tlang thin turin a hrilh a. NHIDCL hotute chuan Mizoram chhunga kawngpui lian- National Highways siam hna an thawh mek hmun 26-ah View Point an siam dawn thu leh View Point pakhat siam nan hian cheng vbc. 2 vel zel hman a ni dawn tih a sawi a. View point siamnaah hian Khawthlirna leh motor 5 dinna leng kawtzawl leh Zun in leh Ek in te a awm tel dawn a, he project hi siam zawh tawh niin thehluh tawh a ni, an ti.

Governor chuan View point apiangah hian enkawltu awm theihna tur Quarters, dawrte/Dhaba leh Water Tank dah tel tha a tih thu a sawi a. NHIDCL lam chuan View Point awmna hmuna ram an neih chu a zim thu te, compensation issue a awm dawn loh chuan an project thehluh tawh belhna an thehluh leh theih thu an sawi a. Mizoram mipui tana hmasawnna hnathawhna dal turin View Point sakna hmunah ram awl chungchangah chuan harsatna a awm a rin loh thu leh theih anga state sawrkar pawhin hma an lo lak tur thu Tourism Minister chuan a sawi bawk a ni.