COVID-19 hri kai naupang te enkawlna tur sa mek

COVID-19 hri leng avanga Serchhip District Hospital-a naupang te enkawlna tur bik, Paediatric Ward sak mek chu a rang thei ang bera zawh tum niin April thla tawp atang khan ngawrh taka hna thawh mek a ni.

Serchhip District Hospital-a COVID-19 hri kai naupang te enkawlna tur bik, Paediatric Ward hi Serchhip damdawi In-a TRAUMA Centre hnunga building, DCHC atana hman mek hnuaiah sak a ni a, kumin April ni 26 atangin a sak hna hi thawh niin a building ruangam awmsa a ni a, tunah hian a chhuat chhunrual a ni tawh a, a bang-ah block rem tur ni bawkin he Ward-ah hian ruahman lawk ang chuan Khum 12 dah tur a ni anga, heng zinga Khum pali (4) hi ICU Room hranah dah a ni anga, High Dependency Unit (HDU) pawh 8 awm tur niin Nursing Station, Doctor Room leh inthiarna te a awm bawk ang.

Pediatric Ward sak mek hi National Health Mission (NHM) hnuaiah Emergency COVID Response Package-II atanga sum lo kal hmanga sak a ni a, ECRP-II hnuaiah hian Serchhip District Hospital tan Pediatric ICU leh Ward tihchangtlun tura tih ni mah se Pediatric Ward awmsa a awmloh avangin DCHC hnuai hmun remchang ah hian sak a ni ta zawk a ni.