Chief Minister in Engineer te Mizoram hmasawnna atan an thiamna leh remhriatna hmang turin a sawm

Chief Minister Zoramthanga chuan Mizoram-a Engineer-te chu Mizoram hmasawnna atan an thiamna leh remhriatna te hmang turin a sawm.

Mizoram Engineering Service Association (MESA) kum 50 tlin lawmna Inrinni kalta a Multipurpose Hall, Beraw Tlang-a buatsaih a hmanpuina ah he thu hi sawiin Chief Minister Zoramthanga chuan ram hmasawnna atan pawimawh pakhat chu tuna kan ram-a awmsa hmang thiam a, kan neih sa te tangkai lehzual zawka hmanga ram hmasawnna atan chan thiam a nih thu a sawi a. Mizoram in chutianga kan neih, tangkaia hman theih (asset) te chu a mipui (human resource) te, a chhunga cheng mipui chawm zo khawp ram zau te, sik leh sa nuam tak te, ruahtui tha tak leh adangte a nih thu leh, chung asset te chu kan ngaihtuahna leh kan thil thlir dan kan tihdanglam chuan nasa takin hma a sawnpui theih thu a sawi a. Kawlphetha (Energy source) lamah pawh la explore loh, mahse theihna (potential) kan neih si tam tak a awm tur thu te, inkalpawhna lamah pawh hmasawnna tur la awm leh hmasawnna ruhrel tam tak din theih a la nih thu sawiin, chung chu kan Engineer te tan chona ni se a tih thu a sawi a ni. Chief Minister chuan he huna kalkhawmte chu an hna theuh ah theihtawp chhuah a thawk zel a, ram intodelh kan nih theih nan kan resource neih te hi hman tangkai a nih nan Engineer rualte a sawm a. Mizoram hmasawnna atan an thiamna leh remhriatna te hmang tur leh ram nuam taka kan ram hi kan siam thei a ni tih hre reng turin MESA Golden Jubilee chu hmasawnna lungphum pawimawh tak a nih a beisei thu a sawi a ni.

MESA Golden Jubilee lawmna inkhawm hi an President Er. Lalropuia chuan kaihruaiin Chief Minister hian MESA Golden Jubilee hriatrengna siam chu a hawng a, General Secretary Er. Benjamin L. Tlumte chuan report a pek bakah MESA dintute chawimawina Chief Minister chuan hlan in, an aiawhin Er. Ramhluna Khiangte chuan thu a sawi a. MESA dintute zing ami Er. P. Lalchhunga chuan MESA Directory tlangzarhin MESA hruaitute chawimawina hun leh member kalta mi 76 sunna hun hman a ni bawk.

MESA hi May ni 14, 1972 khan din niin, a hmaa District Council ni thin Mizoram chu kum 1972-a Union Territory a lo nih tak avangin Assam Engineering Service Association atanga inlahrangin Mizoram Engineer te puala din a ni a. Mizoram Assam member te hi Degree Engineer sawrkar Office hrang hrang leh hmun danga thawk member ni duh te a huam a. Engineer leh Architect sawrkar department - PWD, PHED, P&E, I&WRD bakah H&TED, RD, UD&PA, Police, C&ID etc. hnuaia thawkte leh private a thawkte an tel a ni. Tun dinhmunah member mi 383 an awm mek a, Member pension tawh 31, Member boral tawh (service lai leh pension tawh) 76 leh Member ni thin ni tawh lo 31 an awm bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar