COVID-19 hri kai enkawllai 262 awm mek

Nimin tlai thleng khan Mizoram-ah COVID-19 hri kai enkawllai mi 262 an la awm a, tunhnaiah hri kai enkawllai hi tlem in an pung ve leh hret a ni.

Inrinni khan Mizoram-ah Sample 156 enfiah niin heng atang hian COVID-19 hri kai mi 30 hmuhchhuah an ni a, Sample enfiah atanga chhutin za zela 19.23 te chuan hri an kai a ni. Inrinni-a Mizoram-a hri kai hmuh belh te hi Rapid Antigen Test hmanga Sample enfiah 154 atanga hri kai hmuh te vek an ni a, Aizawl District-ah hri kai mi 16 hmuh niin Saitual District-ah 7, Lunglei District-ah 4 leh Serchhip District-ah mi pathum te an ni.

Inrinni khan Mizoram-ah COVID-19 hri kai enkawl dam mi 23 awm belh lehin nimin khan hri kai mi 7 te enkawl dam an ni leh bawk a, heti hian nimin tlai dar 5:00 thleng khan Mizoram-a COVID-19 hri kai hmuhchhuah tawh chu 2,27,992 niin an zinga 2,27,033 te chu enkawl dam an ni tawh a, hri kai hmuhchhuah atanga chhutin za zela 99.58 te enkawl dam an ni tawh a, hri kai enkawllai mi 262 la awmin hri kai zingah mi 697 an boral tawh bawk a ni. Nimin tlai thleng khan Mizoram-a District 11 zingah Kolasib, Lawngtlai leh Hnahthial tihloh District dang zawngah hri kai enkawllai an la awm a ni.