Scooter bo leh a rutu nia hriat te Serchhip Police ten an man
Serchhip Police te hian tunkar Thawhtanni, Oct. 19, 2026 khan Serchhip IOC Veng leh Chhiahtlang atangin hemi tuk-a Scooter bo report an dawng a, hemi kaihhnawih ah hian kum tlinglo mi pali (4) te chu ringhlelin Thawhlehni (Oct. 20, 2026) khan thu zawhfiah tura lak an ni a. Heng mite hnen atang hian he thil thleng hi anmahni tih ngei a nih thu hi hriain, heng Scooter te hi wiring direct-in Aizawl panna atan an hmang a. Tuirial chhak deuh leh Bung Bangla bulah Petrol a zawh avanga an dah tak pawh chu hmuhlet leh a ni bawk. Hemi rual hian an lo haw leh lama Thingsulthliah-a Scooter pakhat an rawn ruk pawh Serchhip khawchhung ah hian hmuh let a ni bawk a. Heng Scooter an ruk ni, Oct. 19 zing khan Serchhip IOC Veng-a Scooter pahnih chu ruk tumin wiring an khawih bawk a, hei erawh an la thei lo thung a ni.
Hemi hma October 10, 2026 zan khan Serchhip Police Patrolling duty-te chuan Serchhip chhim lam kawtchhuah Sailiamkawn-ah Keitum lama tanga lo kal Scooter pathum te chu enfiah an tum laiin Scooter khalhtute hi an tlanchhe bawk a, Police ten an umzuina lamah Sailiamkawn chhak deuh-ah Scooter pahnih leh Sesah lui bulah Scooter pakhat an tlanchhiatsan chu an hmu a, a khalhtute hi hriat hman an ni lo thung a. Heng Scooterpathum zinga pahnih hi Serchhip Kikawn lam mite ta ve ve leh niin pakhat hi Keitum a mi ta an ruk ngei tih hriat zui a ni a, heng te pawhn hi pek let an lo ni tawh bawk a. Heng Scooter pathum rutute pawh hi tuna man chhuah mi pali zinga pathum te hi an ni tih an inpuanna atangin hriat a ni bawk.
Serchhip Police te chuan thil bo chhui-zuina kawnga mipuite thlawpna leh tanpuina an dawn thin ah lawmthu sawiin, a theih anga tanpui zel turin an ngenin an sawm bawk a ni.