Camping-a chhuak te pualin Skill Training buatsaih dawn

Serchhip District-in kumin February thlaa Nasha Mukt Bharat Abhiyaan (NMBA) hmalakna hnuaia Ruihhlo ngaite pual Gospel Camping a buat-saih atanga ruihhlo sim ta te puala 'Skill Development & Livelihood Reintegration Programme' buatsaih tur hawnna chu nimin khan neih a ni.
Tarlan tawh thin angin kumin February ni 9 atanga ni 20 chhung khan New Serchhip Kohhran Biak In-ah NMBA hmalakna in tlawmngai pawl leh VC bakah Kohhran hrang hrangte tangrual chuan Gospel Camping buatsaihin mi 500 bawr zet an lut a. He Camping-a lut, tun thlenga ruihhlo la sim te tan hian Serchhip DC Office leh LESDE Department-a MBOCWWB tangkawp huaihawtin Skill Training hi neih a ni dawn a, Serchhip DIPRO Hall-ah ni 13 chhung Electric Wiring zirtir an ni dawn a, mi 21 in hming an pelut a ni.

He Training hawnna Serchhip DC Pisapui Hall-a neih hi Addl. DC, Dorothy Muansangi chuan kaihruaiin Bawrhsap Paul L. Khuma chuan NMBA Camping leh ruihhlo dona kawnga Serchhip mipui, NGO, VC leh Kohhran hrang hrangte thawhhona-ah lawmthu sawiin, MBOCWWB, LESDE Department te thlawpna ah lawmthu a sawi bawk a. NMBA Camping leh Skill Training te buatsaih a nih chhoh dan sawiin, 'mi pakhat tal pawh chhanchhuah an nih theihna tura hmalakna' a nih thu a sawi a. Beisei aia tam, mi 21 zet trainees an awm thei chu lawmawm a tih thu a sawi bawk. 

Bawrhsap chuan mi tinin hringnun ah sual do (fight) kan nei vek a, ruihhlo simta te chu an beih lai hmelma hnehtu 'Pasaltha' an nih thu sawiin, hneh zel tur leh hnung tawlh lo tur te, anmahni hual veltu environment tha lo laka inthiarfihlim tur leh mahni inthunun theihna vawng nung zel a, hma sawn zel turin duhsakna a hlan a ni.

He hunah hian Camping Organising Committee Vice Chairman R. Sanghmingthanga leh Trainer  Malsawmkima ten thu sawiin, SDO (Sadar) Rebecca Laldinmawii Hrahsel-in lawmthu a sawi a ni.