Home Minister in PTS Thenzawl tlawhin Police Officer Training mek te fuihna thu a sawi
PTS Thenzawl Training Hall-a thu a sawi ah Home Minister K. Sapdanga chuan Mizoram Police-te chu ‘Mizoram sawrkar lehkha, Police lehkha pheka ziak, Mizoram mipuiten chiang taka an hriat leh a chhiar’ an nih thu sawiin, “Police-te hi khawi hmunah pawh mipuite hmuha sawrkar lanchianna chiang ber leh hmasa ber in ni,” a ti a. An Training chu an kaisanna atan chauh a pawimawh lo tih sawiin, “Police Department tan a pawimawh hle dawn a, a chhawrtu tur chu Mizoram mipuite an ni ang. Chuvangin, Vawiin-ah hian ngawrh taka in training hian, in mitthla ah Mizoram mipuite a cham lian ber tur a ni,” a ti a. Mizoram Police te chu eng tianga lak pawh nise tunah chuan Mizo mipui innghahna, Mizoram Police Uniform ha mek an ni tih sawiin, “In dinhmun atanga kaisang tlaka ngaih in ni a, mawhphurhna sang zawk pek theih turin training in nei mek a ni. In recruitment-ah khan politics rawng a lo kai a nih pawhin, in training-ah hi chuan politics rawng a kai lo a, chhinchhiahna pakhat chauh a lang ta a, chu chu - Mizo mipui rawngbawltu in ni ta tih hi a ni mai,” a ti bawk.
Home Minister chuan kum 5 kalta chhung khan kum tin Police 100 chuangin min boral san ziah thu leh a chhan tam ber chu zu leh ruihhlo kaihhnawih a ni tih sawiin, tam tak chu ruihhlo bansan tawh te ni mah se ruihhlo in an taksa a lo tihchhiat tawh avanga natna tuarchhuak thei lo te an ni tih a sawi a. “Police pakhat kan sun hian, chhungkaw pakhat an tlachhia a, a awmna Police Unit a tlachhia a, Mizoram Police hming a chhia a, Mizoram sawrkarin a tuar thin. Chuvangin he thil hi mimal nuna chhiatna mai a ni lo, kan hnam pum tan chhiatna lian tak a ni,” tiin hei hi pumpelh theih a nih thu leh a pumpelhna chu an kut-ah a awm tih hre reng turin a chah a ni.
Tunhnaiah Police Constable 259-in Basic Training leh Probation hun hmang zo in tun thla chhung hian an Unit-ah an hna an zawm dawn tih pawh Home Minister chuan sawiin, an awmna hmun theuh ah an discipline a that thu te, an taimakna leh an tlawmngaihna te chu an hotuten an sawi thin thu a sawi a. Chumi lo intanna chu recruitment-ah a ni tih sawiin, dik taka lak, Merit chhulchhuak a nih vang a nih thu a sawi a, Cadre Promotonal training nei mekte chu training an zawh hunah chuan heng Constable thar thlawptu tha tak an nei dawn tih a sawi a, “Mizoram Police thar din turin Revival thlarau in chang ngei ang tih beiseiin, Mizoram mipuiten kan lo nghak reng che u,” a ti bawk.
Heng bakah hian Home Minister chuan Police te chu an hriselna vawng tha tura chahin, harstna tawk mahni inchhanchhuak zo lo te tan an hotute an awm reng thu a sawi a. Mizoram Police te khawvel ram dang Police te nen an danglama chu Tlawmngaihna an nei hi a nih thu leh hei hi vawng nung zel turin a chah a, tuna an training zawh atang chuan mipuite rawngbawl saktu tur an ni tih chu thupui berah neiin Police thar an ni tawh ang tiin a chah a ni.
Nimin-a he hun hman hi PTS Then-zawl Principal, Lalthakima MPS chuan kaihruaiin J. Lalthafamkima IPS, AIG (TRG) in inlawmna thu a sawi a, Meghna Yadav IPS, IG (TRG) pawh he hunah hian a tel a ni.
PTS Thenzawl-ah hian Junior Under Officer (JUO) 97, Senior Under Officer (SUO) 89 leh Platoon Commander Course (PCC) 87 ten training nei mekin Excise & Narcotics atanga Constable, Driver, SI leh Inspector zingah Basic training mi 39 an awm mek a, an zawh hun tur erawh a inang lo a ni.