Cyber Crime-ah sum-a inbumna a tam
Mizoram Police Cyber Crime chhinchhiah danin thubuai an ziahluh zingah hian sum lama inbumna thubuai chu za zel-a 75 lai a tling a, kumin 2026 chhung hian Rs. 1,06,44,416/- chu bum tawk te hnenah pek kir leh a ni tawh a. Sum lama inbumna thubuai ziahluh te hi online hmanga inbumna te leh midang sum dawt phuahchawp hmanga lak sak te a ni a, pawisa lak kir te hi Money Restoration Module leh danin a phal anga hmalakna dangte kaltlanga tih a ni. Mizoram sawrkar chuan Cyber Crime dona kawnga chak zawka hmalak a nih theih nan kumin July khan State Cyber Crime Coordination Centre (S4C) chu Mizoram Police hnuaia Unit hran angin a din a, S4C hi Cyber Crime dona kawnga hmalak ngai hrang hrang chhuina, zirchianna, mipui zirtirna, Social Media vil na leh emergency-a chet vat dan te buaipui tura ruahman a ni.
Kumin chhung hian State chhung hmun hrang hrang atangin Cyber Crime Police Station ten Cyber Criminal-ah mi 9 an man tawh bakah Grievance Redressal Mechanism portal chuan dik lo taka Bank Account emaw, sum hrensak avanga harsatna awm thei chinfel hna thawkin kumin chhung hian hetiang harsatna ang chi 28 chu chinfel a ni tawh bawk.
Mizoram Police hian Cyber Crime laka invenna chung-chang zirtirna chu a kalpui reng a, kumin chhung hian a bikin School leh College zirlaite hnenah zirtirna programme vawi 89 kalpui tawhin zirlai 9000 chuangin he zirtirna programme hi an chhim tawh a. All India Radio, DDK leh Local Cable Channel-ah te Talk Show leh zawhna leh chhanna hun te hman fo a ni a, Mizoram Police Social Media Channel te pawh mipui zirtirna thu thehdarh nan hman a ni reng bawk.
Online-a pawisa kaihhnawih bumna emaw, Cyber Crime-a harsatna tawk chuan rang takin Cyber Crime Helpline - 1930-ah engtik lai pawn biak pawh theih a nih bakah National Cyber Crime Reporting Portal (cybercrime.gov.in) ah report nghal tur a ni tih an tarlang a. “I pawisa kha hmuh kir leh theih a nih chuan SMS alert i dawng ang a, Money Restoration Module (mrm-ncrp.mha.gov.in) kaltlangin i pawisa i dil let thei ang. Tanpuina i mamawh chuan Cyber Crime Police Station, 3rd Floor, SP Aizawl Office Building, Treasury Square, Aizawl pawh pan theih reng a ni,” an ti bawk.