Lawngtlai Bawrhsap-in Thingkah-ah DIET a tlawh

Lawngtlai Bawrhsap Donny Lalruatsanga chuan nimin khan Thingkah-a District Institute of Education and Training (DIET) Lawngtlai tlawhin Principal Ngur Hming Liani Chinzah leh thawktute nen an inkawm a, DIET-a thawktute chu Lawngtlai District-in Zirna lama hmasawnna a neih theihna tura thawktu an nih angin Zirtirtu training pek, D.El.Ed Course, In-service Training leh a dangah te theihtawp chhuah chhunzawm zel turin a chah a. Zirtirtu hna chu hna ropui ber pakhat a ni tih sawiin, chumi tura zir mekten Zirtirtu tha tak ni tura tul leh pawimawhte hriatchian a pawimawh takzet tih a sawi a. Zirlaite chu thiamna tak tak nei tur leh hnathawk tlaka inzirchhuak tur te, min rintlak leh chhuanawm, ram leh hnam innghahna tlak ni tura bei fan fan turin a fuih bawk a ni.

DIET Principal leh thawktute hian mamawh hrang hrang an neih te Bawhrsap hnenah hian an lo thlen a, DIET, Thingkah-ah hian tun dinhmunah Principal leh Lecturer 10 awmin, Training lei mi 101 an awm bawk a ni.