Serchhip-ah an duty lai-a nunna chan Police te sunna leh zahna hlanna ni hman a ni
‘Police Commemoration Day’ hi Serchhip-ah chuan nimin zing dar 9:00 khan Serchhip SP Office tual-ah hman niin Serchhip SP, Dhirendra Pratap Singh IPS chuan he ni an hman chhan leh ram tana an Duty laia nunna hlantu Police te chanchin a sawi a, hemi hnu hian heng an duty laia nunna chan Police te sunna hun hi hmangin September 1, 2025 leh August 31, 2026 inkar khan India ram pumah Police mi 154 zetin an Duty laiin ram leh hnam tan nunna an hlan a. Kumin chhung hian vanneihthlak takin Mizoram Police zingah duty laia hmelma kuta thi an awm lo a, kum 1966 atanga tun thlengin Mizoram Police zingah ram leh hnam tana nunna hlan mi 54 lai an awm tawh a ni. Nimin-a he hun hmanna ah hian Addl. SP H Lalduata leh Serchhip SDPO Lalrinzuali te pawh telin an duty laia nunna hlantu Biakrotluanga (L), Serchhip Venglai chhungte pawh he hunah hian sawm an nih angin an tel bawk a ni.
October 21, 1959 khan DCIO Karam Singh hona hnuaia 3rd Battalion CRPF Police party tlemte chuan Ladakh hmuna Hot Springs area, tuipui atanga feet 15000 - 16000-a sang ah ramri veng-a an patrol chu Chinese sipai, ralthuam famkim leh hmanraw tha tak taka thuam te chuan lo lambunin Police sawm (10) in nunna an chan a, Police pasarih (7) te chu hliam tuar chunga man an ni bawk. He thil thlen hnu, kum 1960-a ‘Annual Conference of IGP of States and UT’ neih chuan October 21 chu ‘Police Commemoration Day’ atana pawm turin resolution an pass a. Chutiang chuan kum 1960 atang khan October 21 chu kum tin ‘Police Commemoration Day’ atan hman a ni a, State khawpui leh District Hqrs. tinah India ram humhalhna kawnga inpekna sang ber, mahni nunna hlantu Police Martar huaisente chawimawina ni atan hman thin a ni ta a ni.
Mizoram-ah chuan nimin October 21, 2026 khan Police hmunpui hrang hrang, District Headquarters leh Battalion Headquarters-ah te Commemoration Parade neih a ni a. Mizoram Police hnuaia Commemoration Parade hmanna pui ber chu 1st Bn. MAP Headquarters, Armed Veng, Aizawl-a ‘Martar Thlan’ ah neih a ni a, DGP leh Mizoram Police Senior Officer-te bakah Sister Agencies atanga Officer lo kalte nen urhsun taka Martarte sunna neih niin, martar thlanah zahna pangpar dah a ni bawk.
National Level-ah chuan October ni 21, 2026 zing dar 07:55 khan Police Commemoration Day 2026 Parade chu National Police Memorial (NPM), New Delhi-ah hman a ni a, Union Home Minister chuan he hun hi hmanpuiin kum khat liam ta chhunga Police thawklaia nunna chan tate hming chu Director Intelligence Bureau (DIB)-in a chhiar chhuak a; CAPF-te leh Delhi Police te tangdun chuan Parade an buatsaih bawk a ni.