State CIC atan H. Lalengmawia IAS (Rtd) lakluh a ni
State CIC thar lakluhna hi Lok Bhavan Durbar Hall-ah neih a ni a, he hun hi Chief Secretary Khilli Ram Meena chuan kaihruaiin Larsap-in State Chief Information Commissioner atana H. Lalengmawia, IAS (Rtd.) a ruatna a chhiar chhuak a. Hemi hnu hian Larsap chuan H. Lalengmawia chu rinawmna thutiam chham tirin State Chief Information Commissioner atan a lalut a ni. He hunah hian Public Works Department Minister Vanlalhlana, AH & Vety Minister C. Lalsawivunga, Environment, Forests & Climate Change Minister Lalthansanga, Leader of Opposition Lalchhandama Ralte leh mi pawimawh dangte an tel a ni.
State Chief Information Commissioner atana lakluh tak H. Lalengmawia hi Mamit District-a Kawrtethawveng khaw chhuak niin, thiamna lamah M.A. (Public Administration) Gold Medalist, North-Eastern Hill University (NEHU) niin, NEHU-ah kum 3 chhung Lecturer hna a thawk zui a. Kum 1991 khan Mizoram Civil Service zawmin Batch Topper a ni a. March ni 19, 2014 khan Indian Administrative Service (IAS) ah hlankai niin, AGMUT Cadre 2005 pek a ni a. November ni 30, 2025 khan Superannuation pension-in a chhuak a. A nupui fanaute nen Aizawl Zemabawk-ah an cheng mek a ni.
Mizoram sawkarah hna pawimawh tak tak Joint Chief Electoral Officer; State Protocol Officer; Director, School Education Department; Champhai leh Kolasib District Bawrhsap leh Commissioner & Secretary Home, Environment, Forests & Climate Change, Health & Family Welfare, Power & Electricity, Higher & Technical Education-te chelh tawhin kum 2024 khan thla khat chhung Chief Secretary hna a chelh bawk a. Election Observer niin State hrang hrangah duty-in a chhuak tawh a, official duty-in Sri Lanka, Norway, United Kingdom leh Thailand-te a tlawh tawh bawk. A hna thawh that avangin kum 2025 khan Chief Minister's Award for Excellency in Public Administration a dawng a a ni.
Heng bakah hian dinhmun pawimawh tak tak a chelh tawh zingah Chairman, Empowered Committee, Government of Mizoram; Chairman, Indian Red Cross Society, Mizoram State Branch; Member, North Eastern Regional Institute of Science and Technology (NERIST) Board; Member, Regional Institute of Paramedical and Nursing Sciences (RIPANS) Board leh Executive Council Member, Mizoram University (MZU) te a tel a ni.