Lehkhabu Pho Runpui Thawh 6-na neih tan a ni

Mizo Writers Association (MWA) buatsaih ‘Lehkhabu Pho Runpui Thawh 6-na’ chu nimin khan Aizawl Vanapa Hall-ah neih niin IPRP&S Department Minister, B.Lalchhanzova chuan a hawng a, he hun hi Mizo mipuite’n lehkhabu hlutna kan hmuchhuah thar leh theihna pawimawh tak a nih thu sawiin, Ziakmite chu hmasang ata mi huaisen leh hlu, vau leh tihthaih kara huaisen taka an chhungril ngaihtuahnate phawrh chhuak thin an nih thu a sawi a, zirna chawisangtu, kan ram meichher kengtute an nih thu a sawi bawk. Minister chuan Lehkhabu chhiar tam hnam chu zirna lamah hma an sawn ngei ngei thu sawiin, zirna chu mi rethei leh hausa thliar lo, mi zawng zawng huang khata min dah theitu a ni tih a sawi a, thalaite leh zirlaite chu ziakmi leh an lehkhabu ziahte ngaihlu thiam turin a chah bawk.

Lehkhabu Pho Runpui Thawh rukna hi October ni 16 atanga October ni 24 thleng neih tur niin zing dar 10:00 atanga tlai dar 6:00 chhungin a duh apiang tan hawn a ni dawn a, Zirtawpni bik chuan zan dar 9:00 thleng hawn a ni thung ang. He hun buatsaihna atan hian MWA-te hian Labour, Employment, Skill Development and Entrepreneurship (LESDE) Department atangin Rs. 80,000 an dawng a ni.

He hunah hian Lehkhabu hlui leh copy tam lo tih lo ah chuan lehkhabu phochhuah tam zawkte hi a man pangngai aia tlawma zawrh niin lehkhabu hlui, lehkhabu dawr-a lei tur awm mang tawh lo thahnem tak a awm a. Tun dinhmunah hian ziakmi 128-te lehkhabu ziah chu phochhuah niin lehkhabu chi hrang hrang 1000 vel phochhuah a ni bawk. Lehkhabu Pho Runpui hmasa ber hi kum 2019 khan neih niin a buatsaihtu, Mizo Writers Association-te hi kum 1977 khan din an ni a. Tun dinhmunah an President, R.Lallianzuala hona hnuaiah MWA member mi 298 an awm mek a ni.