PHQ-ah e-Office System

Home Minister K. Sapdanga chuan nimin khan Aizawl Khatla Police Headquarters-a GS. Arya Mess-ah Police Headquarters (PHQ), Mizo-ram tan e-Office system a hawng a, he hmalakna hian Mizoram Police te’n thiamna thar leh tunlai technology leh digital governance hmanga Office kalphung leh hnathawh dan tihchangtlun an ngaihpawimawh zia a lantir tih sawiin, tangkai taka hmang turin duhsakna a hlan a ni. Nimin-a hawn tak e-Office hi Police Headquarters hnathawh phung tihchangtlunna tura rahbi pawimawh tak niin, he System hian file movement rang zawk te, Official Correspondence leh thutlukna rang, langtlang zawk leh lehkha hman tlemna (paperless) environment dinhmun thlen thei tura beisei a ni. PHQ hian Office Branch 18 leh Personal Branch 17, a vaiin Branch 35 a nei a. Officer 23 leh Dealing Officer 53 te tan profile mapping thawh zawh a ni tawh a, e-Office system hlawhtling leh tluang taka kalpuina tur atan NIC chuan Internet Speed 60 mbps an pe a ni.