Nu leh naupiang thihna tihtlem nana sawrkar hmalakna thar ‘SUMAN Roadmap 2030’ tlangzarh
Planning & Implementation Dept. Conference Hall-a ‘SUMAN Roadmap 2030’ tlangzarhna hunah hian Health Minister Lalrinpuii chuan ‘SUMAN’ chu ‘Surakshit Matritva Aashwasan’ tihna a nih thu sawiin, ‘nau pai lai leh nau neih hun chhunga himna’ tihna a nih thu a sawi a. Hmeichhiate leh nausen pianghlimte chuan hriselna kawnga enkawlna tha an dawn theih nan kum 2019 khan kalpui tan anih thu leh SUMAN Roadmap 2030 hian chu intiamkamna chu a chhunzawm zel tih a sawi a ni. Health Minister chuan Mizoram-a SUMAN Roadmap 2030 tlangzarh a ni thei chu lawmawm a tih thu sawiin, he hmalakna hi nu leh nausen te nunna humhim tura Sawrkâr thutiam thar, Public Health System tihchak leh Mizorama hmeichhia zawng zawngte'n naupai leh nau neih chungchanga inrintawkna, zahawmna leh hriselna lama enkawltu ten an tanpui reng dawn tih hriatna nena an hmachhawn theihna tura hmalakna a nih thu a sawi bawk.
Health Minister chuan he hmalakna hi India ramin Sustainable Development Goals (SDG) a tihhlawhtlinna tura a intiamna nen a inmil hle tih pawh sawiin, National Roadmap hian kum 2030-ah chuan nau neih nena inkungkaih avanga nu thi zat (Maternal Mortality) chu nau piang 100,000 zelah 70 aia tlemah tihhniam a, nau pianghlim leh naupang thi thin zat tihhniam belh leh nu leh nau pianghlim thi thei rengte thihna pumpelh tura hmalak a tum a nih a thu sawi bawk.
He hunah hian Health & Family Welfare Commissioner & Secretary Lalzarmawii pawhin nu leh naupangte hriselna enkawlna ah hmasawnna nasa tak hmuh tur a awm thu sawiin, he huna kalkhawmte chu an thawhrimn aah lawmthu a hrilh bawk a. Thlirletnaa tarlan danin, Mizoram-ah damdawi In-a nau neih (institutional delivery) chu nikum 2025-26 chhung khan 93% vel a ni a, naupai tirh lamah Antenatal Registration (1st trimester) chu 81% vel a tlin thu a sawi bawk a. Lawngtlai, Mamit leh Lunglei District-ah te damdawi In-a nau neih a la hniam thu leh nau char thiam bik ‘Skilled birth attendant’ awm lova ina nau neih a la awm chu ngaihven bik a tul tih a sawi bawk.
Nimin-a he hun hman hi National Health Mission (NHM), Mission Director, Dr. R. Lalchhuanawma chuan kaihhruaiin Dr. S. Thaizi, State Programme Officer (RCH), NHM chuan SUMAN Roadmap 2030 chungchang leh hmalakna te a sawifiah a, District tin aiawhte chuan an Bial chhunga an dinhmun te, hmasawnna an neih te leh harsatna an tawh dan te bakah programme kalpui danah harsatna an neihte an tarlang bawk a ni.