Mizo hnam peng hrang hrangte Kut leh ze tha tinrengte chu Mizo hnam thil pawimawh an ni vek tih sawi

Ngaizawl khawtlangin ‘Khawdo Kut’ an buatsaih chu Chief Minister Lalduhoma chuan nimin khan khuallian nia hmanpuiin, “Mizo hnam peng hrang hrangte Kut leh ze tha tinrengte chu Mizo hnam thil pawimawh an ni vek,” tiin he Kut hmangtute chu Kut Chibai a buk a ni. Khawdo Kut (Khuado Pawi) hi Mizo hnam peng Paite Kut ropui bera ngaih a ni a, chanchin hlui zirtu (Historian) te chuan AD 1400 vel atangin he Kut hi an la hmang tawh thin niin an ngai a, nimin-a Ngaizawl Field-a Ngaizawl khawtlangin Khawdo Kut an buatsaih-ah hian Chief Minister Lalduhoma chuan Tualpui khaw mite tan chuan Ngaizawl chu mahni khua ang maia an en a nih thu leh Khaw mipuite pawh u leh nau anga an ngaih an nih thu a sawi a. “A khaw ram, a tlang dung leh ruamte hi kan mitthla kual thei vek a. Ka lung tileng thintu, ram ngaihawm tak a ni. Vawiin ah rawn kalna remchang ka neite hi ka lawm a, khawtlang mipuiten hlim taka min lo mikhual avangin a hahdamthlak pawh ka ti hle a ni,” tiin Mizo hnam peng hrang hrangte Kut leh ze tha tinrengte chu Mizo hnam thil pawimawh an nih vek thu leh a theih ang angin kan humhalh zel tur a nih thu a sawi bawk.

Chief Minister chuan  tunhnaia Ngaizawl khawtlangin hmasawnna thar a hmuh thenkhat te tarlangin, SASCI 2026 - 27 Part - I (Untied) ah Ngaizawl to Tualpui kawng laihna tur cheng vbc. 5.36 dah a nih thu te; Ngaizawl khaw kiangah van ruahtui leh luite tui dahkhawlna tur tuikhuah (Eco Tourism Water Harvesting Pond) lian tham tak siam mek niin a thawh zuina tur cheng nuai 376 an dah thu te; Khawzawl to Ngaizawl kawng km 13.340-a thui chu PMGSY-II hnuaiah April 1, 2024 khan thawh zawh niin March 31, 2029 thleng Contractor hian a enkawl zui tur thu leh a chhe zual chu kumin kumtirah khan siam a nih thu te; Cheng vbc. 5.26 senna Ngaizawl WSS Solar Pumping NABARD RIDF-XXVIII hnuaia thawh chu kumin March 2025 khan thawh zawh a nih thu leh hmalakna dang te a tarlang bawk a ni.

Khawdo Kut hi VC Vice President A. Thangsuanpau chuan kaihruaiin Khual zahawm leh Bialtu MLA H. Ginzalala leh VC President Robert Khamkhanpau te pawhin thu an sawi a ni.

Ngaizawl hi kum 1927-ah Burma atanga rawn tla thla Paite hnamten Tualpui lal ram chhungah, khatihlaia Tualpui lal Thanherhna phalnaa an din a ni a. A hnuah lal Thanherha fapa naupang zawk Khenchhuma chuan a awpzui a. Rambuai lai khan Khawzawl-ah khawm an ni a. Nimahsela, Jhum Permit hmangin Ngaizawl-ah hian Bawk an khawh zui zel a, kum 1927 atanga tun thlengin mei a mit lo tia sawi theih a ni.