Pi Mari-i hnenah FAO Women Heroes Award hlan
Food and Agriculture Organization (FAO) of the United Nations chuan International Year of Women Farmer 2026 puala ‘FAO 100 Women Heroes in Agrifood Systems and Rural Development' an thlanchhuah zing ami Lawngtlai District chhung Sangau khaw mi ZT. Lalrithangi hi Strawberry hlawhtling taka chingtu niin a chawimawina dawn hi Italy khawpui Rome-ah hlan a ni a. Mari-i hi Mizo zingah hetiang Award dawng hmasa ber niin Ram hrang hrang 131 atanga mi 600 chuang atanga thlanchhuah a ni.
He chawimawina dawng tur hian India atangin mi pahnih thlan an ni a, World Food Forum event, FAO Headquarter, Rome, Italy-a October 12-16 chhunga neih ah he Award hi hlan a ni. ZT. Lalrithangi (Pi Mari-i) hian Strawberry chin kawngah taima taka hma a lakna te, a inpekna, a phurna, a thawhrimna leh chhuan awmzel tur tana entawntlak taka a thawh avangin he chawimawina ropui tak hi a dawng a, Amah hi Horti Fair, Mizoram 2026-a Lawngtlai Best Farmer lawmman dawngtu a ni bawk.