Mizoram Police Motorcycle Rally Team te vailiam

Aizawl atanga Ekta Nagar, Gujarat thlenga kal tur Mizoram Police Motorcycle Rally Team chu nimin khan Director General of Police (DGP) Mizoram Sharad Agarwal IPS chuan PHQ Aizawl atangin a vailiam.
He Rally hi India Sawrkar, Ministry of Home Affairs thupêk angin Rashtriya Ekta Diwas Parade, ‘Ruihhlo Do’ (Fight Against Drugs) thupui hmanga buatsaih a ni a, Member 8 (pariat) awmna Rally Team hi Team Leader Jeremia Vanlalhmachhuana MPS, SDPO, Khawzawl chuan a hruai dawn a, Bike khalhtu mi 5 (panga) leh a puibawmtu (support staff) mi 2 (pahnih) te an tel bawk a ni. Aizawl atanga Ekta Nagar, Gujarat thlen nan hian kilometre 2,900 vel an tlan dawn a, an kal kawngah hian zirna In-ah Drugs chungchang inzirtirna (awareness program) an buatsaih thin dawn a ni.

Ruahman ang chuan Guwahati, Assam-ah North-East State dang Rally Team nen inhmukhawmin, chuta tang chuan Ekta Nagar, Gujarat panin an kal anga. October ni 31, 2026-a Sardar Vallabhbhai Patel pianchampha (birth anniversary) a lo thlen hunah Rashtriya Ekta Diwas Parade-ah an tel ve dawn a ni.