Kanghmun South-ah Asian Games Gold Medalist lo hmuak

Asian Games 2026 neih zawh taka India tana Hmeichhe Hockey-a Gold Medal latu Kanghmun South nula, F. Lalthantluangi chuan nimin khan an khua thlengin ropui taka lo hmuah a ni.
Asian Games 2026-a Gold Medalist F. Lalthantluangi hian nimin khan Aizawl atanga Kanghmun South hi thlengin khaw mipui ten an lo hmuak a, Kanghmun South Community Hall-ah Vantlang Inkhawm neih nghal niin he hun hi VC Vice President, H. Lalfakzuala chuan a kaihruai a, he hun hmanpuitu Bialtu MLA leh Lunglei HPC Vice Chairman, V. Malsawm-tluanga chuan lawmpuina atan Scooter thar hlanin Kanghmun South-ah hian sawrkar kum thar ah Lalthantluangi hming chawiin Field laih a nih dawn thu a sawi a. Lalthantluangi inkhelh chhoh dan te tarlangin, India tan a fehchhuah tum hnihna ah hetiang hlawhtlinna a chang thei chu a lawmpui thu leh Pathian ropuina a nih thu a sawi bawk.

He hunah hian Serchhip-a District Sports & Youth Officer (DSYO) Vanthangpuia pawhin Serchhip District in hetiang mi chhuanawm a nei chu ropui a tih thu leh a lawmpui thu sawiin, Ser-chhip-ah ropui taka hmuh duh mah se a remchan zawkna avanga tih theih a nih tak loh thu te a sawi a. Anni bakah hian Thenzawl-a SAI Coaching Staff-a Lalthantluangi lo enkawl tawhtu te, Sub-Hqrs. YMA Serchhip, Vantawng Group YMA, Thenzawl Hockey Association leh Serchhip District Hockey Association bakah S&YS Department-a Joint Director, Lalremsanga te pawhin lawmpuina thu sawiin, thilpek chi hrang hrang an hlan hlawm a. Tlai lamah khawtlang huapin Gold Medal lak lawmna ruai an kilho nghal bawk.

Lalthantluangi hi Thenzawl-ah pawh lo hmuah niin he hunah hian Thenzawl Joint VC te chuan Bialtu MLA leh Revenue Minister te nen an sawiho hnuah Lalthantluangi hlawhtlinna lawmpui nan Thenzawl-ah Inhmun an pe dawn tih an puang a, mi thahnem takin lawmpuina thilpek an hlan nghal bawk a ni.