MizoTaxi application-ah lirthei 1,894 ziahluh a ni tawh
Akashvani News Aizawl zawhna chhangin Transport Department hotute chuan, MizoTaxi Mobile app-a inziahluh hun hi vawi hnih pawhsei a ni tawh a; a hnuhnung zawk hi September ni 4 khan pawhsei a nih thu puan niin kar hmasa Ningani, September ni 30 thleng khan hun hawn a ni a, hemi chhung hian lirthei 324 an inziaklut a ni.
Aizawl khawpuia service Four Wheeler Taxi, Two Wheeler Taxi leh Auto Rickshaw-te chu MizoTaxi app-ah hian inziaklut vek turin sawrkar chuan a ngen a; tun dinhmunah hian lirthei 1,894 inziaklut an awm a, heng zinga 1,402 hi Two Wheeler Taxi niin an tam ber a, Four Wheeler Taxi 468 leh Auto Rickshaw 34 an inziaklut bawk a ni. Nimin thleng khan MizoTaxi passenger app bik hi mi 30,737-in an download tawh a ni.
Coordination Committee on Traffic Management-in a rêl angin Aizawl Traffic SP chuan kumin September ni 11 khan hriattirna a tichhuak a; MizoTaxi-a inziaklutte chu kumin September ni 14 atanga December ni 14 thleng nitin an tlân phal a ni a; MizoTaxi-a inziaklutte chu Taxi hma leh hnungah STA-in a pek MizoTaxi sticker târ ngei tura hriattir an ni a. MizoTaxi app-a inziaklut lo lirthei dangte erawh an intlânchhâwk dan pangngaia tlan tura tih an ni thung a ni.
