Serchhip-ah Bawrhsap hovin RTI Week hman a ni
Serchhip District-a RTI Week hawnna hi Serchhip Deputy Commissioner Office leh District Information & Public Relations Office te huaihawtin Serchhip Bawrhsap Pisapui Hall-ah neih a ni a, he hun hi Bawrhsap Paul L. Khuma chuan hmanpuiin sawrkar hnathawk te chu langtlang leh rintlak sawrkar siam tura mawhphurtu, mipuite'n rinna an nghah ngam an nih a tul thu a sawi a. Rawngbawl saka awm tur an ni lo tih sawiin, mipuite rawngbawl saktu zawk an ni tih hre thar leh theuh turin a fuih a ni.
He hun hi Serchhip Addl. DC Dorothy Muansangi chuan kaihruaiin Assistant District Rural Development Officer leh RTI Master Trainer Stephen Laltlansanga Auhmun chuan RTI chungchanga hriat tur pawimawh chi hrang hrangte a sawi a; RTI zawhna chu Plain Paper hmangin awlsam taka zawh mai theih a nih thu te, sawrkar hmalakna leh file-a note ziah dan te, hnathawhna hmun endikna (Inspection) thlengin dil theih vek a nih thu sawiin, RTI chu sawrkar langtlang neihna tur leh mipuite thuamchakna hmanraw pawimawh tak a nih thu a sawi bawk.
He hunah hian sawrkar Office hrang hranga hotute, Department hrang hranga hnathawkte, MJA te, khawtlang hruaitu VC leh YMA te, MUP leh MHIP te bakah RTI Activist te telin zawhna leh chhanna hun hman nghal a ni a, Serchhip District Information & Public Relations Officer R. Vanneihtluanga'n lawmthu sawiin hun hi a khar a ni.
Mipui ten sawrkar-a hriat duh an neih hrang hrangte an zawh theihna, Right to Information (RTI) Act hi kum 2005 khan hman tan a ni a, hemi denchhen hian ‘RTI Week’ hi kumtin hman thin niin kumin hian October 5 to October 12 chhung hian hman a ni dawn a, hmun hrang hrangah he Dan inzirtirna hun atan hman a ni.