Mi 674 ten sawrkar-a PPO an thehluh vangin kumtin vbc. 15 chuang hum thei tura ngaih a ni
Nimin khan Mizoram sawrkar-a Finance Department Secretary Ramchuana hovin a Pisa-ah ‘Voluntary surrender of Pension Payment Order (PPO)’ chungchanga Sawrkar hmalakna te thlirletna hun buatsaih a ni a, tarlan tawh angin sawrkar chuan dan dik tawk lova Pension/Family pension la ten anmahni duhthu ngei a PPO surrender hun chu kumin July ni 1 atanga hawngin September 30, 2026 thleng khan hun hi hawn a ni a, nimin-a thutkhawm a tarlan a nih danin sawrkar in hun a hawn chhung hian Treasury hnuaia Family Pension la mi 563 bakah Bank atanga Family Pension la mi 111; an vaiin mi 674 in PPO hi anmahni duh thu in sawrkar-ah an thehlut a. Heng mi 674 ten an PPO surrender avanga sawrkarin sum a hum tur zat chu thla khatah Rs. 1,25,65,901/- a ni a, kum khat ah Rs.15,07,90,812/-) lai a ni thei dawn a. Hemi chungchangah hian Finance Department changtu Secretary chuan sawrkar policy tih hlawhtlinna kawngah thahnemngai tak a thawktu, a thawhpui zawng zawng Village Council/Local Council/NGO/Kohhran te chungah lawmthu a sawi a ni.
Hetih rual hian Voluntary surrender hun a tawp tak avangin dik tawk lova Pension/Family pension la an la awm em tih endik hna thawktu tur Task Force te hmalak dan tur inhrilhfiahna neih nghal a ni a. Task Force hi Coordinator panga (5) te enkawlna hnuaiah Team 13-ah then an ni a, Team tinah District Treasury Officer theuh te Team Leader an ni nghal ang. Task Force te hi a hma thei ang ber a fehchhuak thei turin ruahmanna siam a ni a. Thil fello emaw, dik tawk lo emaw an hmu a nih chuan a ti diklo tu chu Show Cause Notice pek an ni anga, ni 15 chhung insawifiahna hun pek tur an ni a. He endik hna leh a kaihhnawih dangte chu kumin December 31 hma a zawhfel tum a ni. He hunah hian Chief Controller of Accounts, Accounts & Treasuries leh Finance Department a Officer te leh Team Coordinator te an tel a ni.