Zangnadawmna la dawng lo te pek vat phut

PM-DevINE hnuaia PWD-in Aizawl Western Bypass Road laih hna an thawh mekah kawngin a paltlang ram neitu zinga zangnadawmna la dawng lo te chuan Mizoram sawrkar chu tun thla chhunga zangnadawmna pe vek turin an ngen a; an ngennain awmzia a neih loh chuan November ni 1 atangin kawng laih hnathawh mekte chhunzawm a nih loh nan hma an la dawn tih an sawi.

Nimin khan Aizawl Western by-pass Road-in a paltlang tura ram neitute intelkhawmna, Sihhmui to Muallungthu Land Owners Welfare Association hruaitute chuan Aizawl Press Club-ah thuthar thehdarhtute an kawm a; an pawl President Zion Lalremruata chuan zangnadawmna aia LSC thlangte ram chu teh sak ni tawh se an duh thu te, quarry neitute chu Department a Statement an rawn siam angin pawm sak a, pek nise an duh thu te, kawng laihna leivungte chu Dumping Ground-ah chauh paih ni tawh se an duh thu leh kawng laih avanga lemin leh leivungin a tihchhiat huan thlaite chu an tihchhiat hu zangnadawmna ram neitute hnenah pek ni se an duh thute a sawi a ni.

Zion Lalremruata chuan, tunhnai khan Zonet Cable TV in RTI hmanga PWD hnena zawhna an siam, PWD-in an chhan dan chuan zangnadawmna pawisa la pek loh hi mi 17 an la awm ang leh zangnadawmna hi cheng nuai 98.3 chauh sem tur nei tawh anga an sawi chu mak an tih thu a sawi a; an hriat danin zangnadawmna la dawng lo mi 100 chuang an la awm a, zangnadawmna pek tur hi cheng vbc 7.4 vel a ni tih a sawi bawk.