MJA-in I&PR Director chhuak tur thlahin a thar lawmpuina hun hmang
Nimin-a he hun buatsaih ah hian I&PR Director chhuak ta K. Vanlalsangi chuan MJA ten hun tha tak an buatsaih sak avanga lawmthu sawiin, I&PR-a a thawh chhung zawnga MJA te thlawpna avang leh thawhhona tha tak an neih thin avangin lawmthu a sawi a. MJA leh I&PR inkarah inunauna tha tak awm chhunzawm zel se a duh thu sawiin, Director thar te nena thawhhona tha tak nei zel turin a duhsakna a hlan nghal a. I&PR Director thar Mina Zoliani Joute pawhin MJA ten I&PR Director chhuak ta te thlahna leh a lut thar te lawmpuina hun tunhman atanga an buatsaih thin chu lawmawm a tih thu leh inchawimawina hun ropui tak a nih thu a sawi a. MJA leh I&PR te chuan hman ata thawhhona tha tak an nei tawh thin tih sawiin, thawhhona tha tak an neih chhunzawm zel a beisei thu a sawi a. I&PR chu MJA te tan Nodal Department a nih angin finchhuah an ngaihna laiah te finchhuah zel tura chahin, I&PR Office-a leng lut tam thin turin MJA member te chu a sawm bawk a ni.
Nimin-a he hun hman hi MJA General Hqrs. a Vice President C. Lalhmachhuana chuan kaihruaiin MJA President Vanlalrema Vantawl pawhin I&PR in MJA te an thlawp thinna zawng zawngah lawmthu a sawi a. MJA President chuan Director chhuak ta K. Vanlalsangi chu Director hna a chelh chhunga MJA te hmasawn nana a hnathawh zawng zawngah lawmthu a sawi a, a kal lehzelna turah duhsakna a hlan nghal a. MJA leh I&PR te chuan inlaichinna tha tak an nei thin tih sawiin, “Journalism-in hma a sawn chuan ram leh hnamin hma a sawn thin a ni,” a ti a, thuk lehzual zawka inlaichinna tha siam turin kalkhawmte chu a chah a. MJA te chuan hmachhawp tam tak an nei tih sawiin, I&PR Director thar hona hnuaiah hma an sawn zel a beisei thu a sawi bawk.
He hunah hian I&PR Director chhuak ta K. Vanlalsangi leh Director thar Mina Zoliani Joute te chu ngaihhruina leh lawmpuina thilpek a hlan nghal a ni.