Khuh damdawi hmansual chungchang sawihona nei
SAD Conference Hall-a he sawihona hi Health Minister Lalrinpuii leh Excise & Narcotics Minister Lalnghinglova Hmar te kaihhruaina hnuaiah neih niin ruihhlo hlauhawm leh buaipui awm bera ngaih Heroin a van chhoh tak deuh avangin mi tam tak chu damdawi (pharmaceutical drugs) ruihtheih lamah an tlan tih sawilan a ni a, damdawi ruih nana hmansual theih thahnem tak man a nih tawh thu te, damdawi zuar licence neitu ngei pawh an damdawi lakluh leh zawrh dan fello avanga mi engemaw zat man leh Court-a thubuai siam sak an awm tawh thu sawilan a ni bawk a. Codeine Syrup chu damdawi hman sual hluar ber a nih thu sawi niin, damdawi zuartuten Mizoram-ah an lalut tam hle a, Doctor chawh chauhva hralh tur (prescription drugs) ni mah se, Doctor chawh lohvin a luangral tam hle a, thalai rual leh mi pangngai tak tak, naupang chenin an hmang sual nasa hle tih tarlan a ni a. Khuahkhirhna a nasat avangin damdawi dawr pangngai ah chuan mamawh tan pawh lei tur a vang hial tawh zawk a, amaherawhchu a ruk a rala hralh a nasa hle si a, damdawi zuar thenkhatte bakah Medical Representative inti tam tak hetiang damdawi ringawt buaipui hi awm thu te pawh sawilan a ni bawk.
Heng bakah hian Codeine Syrup ni reng si damdawi dang daih anga lantir nana damdawi Label dang daih bel, damdawi bur engemaw zat man a nih thu tarlan a ni bawk a. Hei hi phailam-a tute emaw thurualpui neite thil tih niin heng damdawi zawrh kawnga inhnamhnawihna nei mi engemaw zat man an nih tawh thu leh a siamtu ngei manchhuah dan tur sawiho a ni a, Excise & Narcotics Department-in ngawrh takin investigation an kalpui mek chu lo bawhzui zel se, FDA leh Central YMA pawhin an hmabak lo bawhzui zel se tih a ni.
Dan lova damdawi ruih theih thehdarh thintute dapchhuahna kawngah thawhhona tha zawk neih dan tur sawiho a ni a, thawhhona tha tak hnuaiah chuan kan rama damdawi hmansualna pawi tak hi tihreh theih beiseina lian tak neih a ni a. Hun remchang hmasaah Minister pahnih te kaihhruaina bawkin tun tum meeting member-te bakah Mizoram Chemists & Druggists Association, Mizoram Medical Representative Association leh Mobile Drugs Dealers Association tela meeting neih leh nise tih a ni bawk.
He thutkhawm ah hian Health Department leh Excise & Narcotics Department hotute bakah Central YMA hruaitute telin, Health Minister Lalrinpuii chuan sawrkarin rintlak ah ngaia drugs licence a pekte zingah mi rinawm lo, damdawi ruih theih sum siam nan chauhva hmang thinte chu manchhuah an nihin, an licence cancel sak zel a nih tur thu a sawi bawk.