‘Winter Run Mizoram’ neih dan tur sawiho

Kumin December 12 zan khian Aizawl-ah ‘Winter Run Mizoram’ neih a ni dawn a, he hun hi inelna ni lovin rilru leh taksa hriselna chawilar nan, ‘Fun Run’ anga buatsaih tum a ni.
‘Winter Run Mizoram’ neih dan tur chungchang hi nimin khan Sports Minister Lalnghinglova Hmar hovin a Pisa-ah neih a ni a, Sports Minister chuan ‘Winter Run Mizoram’ chu Winter Festival khuhhawnna atan ruahman a nih thu sawiin, “Winter Festival khuhhawnna’n thil danglam leh mipui nawlpui tel theihna, taksa invawn leh hriselna promote thei ni bawk si buatsaih kan duh a, chutiang tur chuan Winter Run Mizoram hi ruahman a ni. Thalai leh nu leh pa a tam thei ang ber tel turin kan sawm,” a ti.

Nimin-a thukhawm hian ‘Winter Run Mizoram’ chu December ni 12 (Inrinni) zan dar 8:00 atanga tan turin a rel a. Lammual atanga Sikulpuikawn thleng kawng chunga tlan in, a let lamah kawnghnuai ah Zodin atangin Chanmari an tlan tlang ang a, Chanmari atangin Lammual-ah let leh tur a ni ang. A pumpuiah kilometre nga tlan tura ruahman a ni. Zana tlan tur a nih avangin kum 14 chin chunglam an tel thei dawn a, a aia naupang tel duh an awm chuan nu leh pa emaw, guardian in an telpui thei ang.