Chanchin thar thenkhat :

MZP in Remna Ni an hmang

MZP General Hqrs. buatsaihin nizan hmasa khan Ignite Studio-ah Remna Ni lawmna neih a ni a, he hun hi Deputy Chief Minister, Tawnluia chuan a hmanpui a ni. Remna Ni lawmna ah hian Deputy Chief Minister chuan Remna Ni chu Mizo National Movement in a hrinchhuah a ni tih sawiin, “Mizoram Buaina kan tih thin hi Helna leh Kawhmawh bawlna avanga lo awm a ni lova, Hnam Movement a nih avangin inbiakna pawh Political Level-ah neih a ni a. He Inremna hian Mizoram pawh dinhmun sang zawkah dahin Political and Administrative thil pawh a kengtel,”  a ti bawk. He hunah hian MZP General Hqrs. President, B. Vanlaltana pawhin zalen kan nih theihna tura nasa taka beitute leh Remna leh muanna kan neih theih nana theihtawp chhuahtute MZP chuan zahna chibai an buk tih a sawi bawk.

MIMA in lawmthu an sawi

Mizoram Merchant Association (MIMA) chuan MIMA leh sumdawng pawl hrang hrang ten sawrkar an ngenna ngai pawimawha dawr leh sumdawnna hmunte hawn phal a ni ta chu an lawm takzet tih thuchhuah siamin an tarlang a. Sumdawngte chu mahni dawr theuhah midang nena inkarhlata awm ngai pawimawh turte, Sanitizer kawl theuh turte, Dawr nghaktu leh a dawrtu ten hmui tuamna hmang vek turte, Kut silfaina ngai pawimawh tur leh Thingpui leh tui inna no inhman tawm lo turte in an chah bawk.

Sialhawk-a hnathawh enfiah

Sialhawk NGO Coordination Committee chuan Sialhawk Water Supply Scheme hna-thawh mek chu nimin khan Khawzawl PHE Department JE, Laltlinpuii hovin an enfiah a, RCC Main Reservoir sakzawh tawh thenkhat chu a foundation lungrem a that tawkloh avangin hna-thawktute hnenah remtha leh tura hriattir nise an ti a. Chowkidar Quarters sak mekah drawing leh estimate-a inmil lo tam lutuk chu ngaimawhin Estimate leh drawing nena inmil tura sak a nih theih nan thuneitute hnenah thlen nise an ti bawk.

Tuialhthei man sang thlen

Mizoram Pradesh Congress Committee (MPCC) chuan All India Congress Committee (AICC) ruahmanna angin Petrol leh Diesel man sang zel tihniam tura ngenna nimin khan Aizawl DC kal-tlangin India President hnenah an thlen. MPCC in nimin a lehkha an thehluh ah hian India ramin sum leh pai-a harsatna nasa tak a tawh chhoh mek laiin sawrkar laipui BJP kaihhruai chuan Petrol leh Diesel man nasa takin a tisang chho zel tih tarlangin, hei hian mipuiah nghawng thalo tak a nei mek tih an tarlang a. Kum 2014-a BJP-in sawrkarna an siam tan tirh khan Petrol litre khatah Excise Duty (chhiah) Rs. 9.20 leh Diesel litre khat zelah Rs. 3.46 lak a nih thu tar-langin, BJP sawrkar thar chuan nasa taka tisang chho zelin kum 6 a liam meuh chuan Excise duty pawh litre khat zelah Petrol-ah Rs. 23.78 ni tawhin, Diesel-ah Rs. 28.73 a ni tawh tih an tarlang a. Diesel-ah 820% leh Petrol-ah 258% zetin an tisang tawh tihna a nih thu leh kum 6 chhung hian Petrol leh Diesel atang ringawta sawrkarin chhiah a lakkhawm tawh chu cheng vbc. nuai 18 zet a ni tawh tih an tarlang bawk.

PM thuchah sawiah BJP in lawmthu an sawi

BJP Mizoram Pradesh President, Vanlal-hmuaka chuan June 30-a India Prime Minister, Narendra Modi-a’n mipuite hnena thuchah a sawi ah Lockdown tirh atanga PMGKY hnuaia Free Ration kalpui mek chu November, 2020 thleng kalpui chhoh a nih tur thu a puang tih sawiin, he Free Ration hi India khua leh tui mi vbc. 80 chuangin COVID-19 hrileng mek leh Furpui kan tawh chhoh meka ei leh bara harsatna kan tawh lohna atan leh riltam-a kan awm lohna tura rua-hman a ni tih a sawi a. Hetianga ram mipui te leh miretheite hmakhua ngaitu, miretheite lam tang Prime Minister kan nei chu an chhuang takzet tih a sawi bawk.

MSB in zirlaite hnenah Scho semchhuak leh mek

Mizoram Scholarship Board (MSB) chuan nimin, July 1, 2020 atang khan zirlaite hnena Scholarship sem hmabak chu Mizoram Cooperative Apex Bank (MCAB) kaltlangin an semchhuak leh a, ruahman dan chuan Apex Bank leh Rural Bank a Account nei te nimin ah pek vek hman tum niin a tahtawlin Bank dang pawh kalpui zel a ni ang.