Zo Heritage Centre din tuma hmalak mek a ni

Tourism Minister, Robert Romawia Royte chuan Zo Heritage Centre dinna tur hmun zawn mek a nih thu sawiin, Samtlang khawtlang hruaitute chuan Zo Heritage Centre atana ram pek an phal thu an sawi.

Tourism Minister, Robert Romawia Royte leh Horticulture Development Board Vice Chairman, Prof. Lalnunmawia te chuan nimin khan Samtlang khua tlawhin Mizo Cultural Organisation (MCO) hruaitute leh Samtlang VC leh Branch YMA hruaitute nen Tourism Department hnuaia Zo Heritage Centre dinna tur hmun Samtlang Mualkawi ram chu an tlawh a, Tourism Minister chuan Mizoram Sawrkar chuan Zo Hnam hrang hrangte hnam ziarang lanna tur, Zo Heritage Centre bakah North East India-a Hnam hrang hrangte ziarang lanna, North East Heritage Centre te dahkhawm tum a nih thu sawiin, sum leh hmunhma awmdan azirin Asia rama hnam hrang hrangte ziarang lanna tur Asian Heritage Centre te pawh ruahman tel tha a tih thu a sawi a. Thil lian tham leh Hnam khawih thil a nih avangin a hmunhma tur pawh Aizawl hnaih si-ah zau tham tak an zawn thu sawiin, Zo Heritage Centre hi Tourists te hipna a nih piah lamah khawvel-a Zofate insuihkhawm nan leh inpumkhat nan a pawimawh avangin Mizoram Sawrkarin a ngaipawimawh hle a, Mizoram-a la awm ngailo leh thil hautak tak ni mahse Heritage Centre din nan hian Foreign Funding beisei a nih thu a sawi bawk.

He hunah hian Samtlang khawtlang hruaitute chuan All NGOs Meeting-in a remtih hnuah Vantlang inkhawmin Zo Heritage Centre atana helai ram hi sawrkar leh MCO-ah pek an phal thu an sawi bawk.