Thlamuang takin awm ila, kan tih tur chinah erawh thuawih leh strict takin awm ang u - Health Minister

Health Minister, Dr. R. Lalthangliana chuan Mizoram chu Pathian in mal a sawm tih sawiin, “Thlamuang takin awm i la, kan tih tur chinah erawh thuawih leh strict takin awm ang u,” tiin COVID-19 hri do kawng ah Mizoram hmalakna chuan Sawrkar laipui fak a hlawh thu a sawi.

Health Minister Dr. R. Lalthangliana hian nimin khan Kolasib District tlawhin District Level Task Force on COVID-19 bakah an District chhunga Medical Officer te leh Village Council Association aiawhte DC Conference Hall-ah Meeting a neihpui a, he hunah hian Health Minister chuan COVID-19 vei kan neih te chu rampawn atanga lo haw deuh vek an nih thu leh heng hri vei tam zawk te chu harsatna awm lova enkawl dam zel an nih thu a sawi a, COVID-19 hri do tura Sawrkar Department hrang hrangte leh NGO te thawhhona chu ropui a tih thu a sawi a. Mizoram chu Pathian in mal a sawm tih sawiin, “Positive kan neihte pawh an negative chho zel a, tunah chuan positive 37 chiah kan nei ta rih a. Thlamuang takin awm i la, kan tih tur chinah erawh thuawih leh strict takin awm ang u. Kan thenawm State Assam-ah pawh nikhat thil thuah a darh huk tih hriain i fimkhur em em zel ang u,” a ti a. Rampum anga COVID-19 dona kawngah Kolasib District hmalakna chu a pawimawh zual hle tih a sawi bawk.

COVID-19 dona-ah Chief Minister a fakawm zia pawh sawiin Health Minister chuan, a hmalakna in Kolasib-ah pawh enkawl hautak lo zawk, Doctor-te pawhin an handle theih mai TrueNAT-Quattro (Mini Real Time-PCR) pawh dah thuai an tum thu leh awlsam takin ZMC pan ngai lovin sample an test zung zung thei ang tih a sawi a. COVID-19 hri leng avang hian Mizo-ram-a Health Sector tihchak leh tih changtlun tum mek a nih thu sawiin, Kolasib District a khum 100 awmna Hospital sak vat chu Sawrkarin a ngaih pawimawh thu leh hemi tih puitlin nan hian chak taka hmalak a nih thu a sawi bawk.

Nimin thutkhawm hi Kolasib DC, Dr. H. Lalthlangliana chuan kaihruaiin PHC hrang hranga Medical Officer te report ngaihthlak niin PHC-a hman tur Hand-Sanitizer, Glove leh hmanraw dangte hlan nghal a ni bawk.