Mizoram-ah hri kai hmuh belh leh an ni

Mizoram-ah COVID-19 hri kai enkawl dam an nih mek laiin nizan hmasa khan hri kai hmuhchhuah thar mi 9 an awm leh a, an vai hian Siaha District mi vek an ni.
Sawrkar thuchhuah in a tarlan danin niminpiah khan Aizawl, Lunglei, Serchhip, Siaha District leh ZMC-a awm te atanga Sample lakkhawm 170 chu ZMC Laboratory-ah enfiah niin heng atanga result hriat tak zingah 157 chu negative niin a dang pathum, Serchhip atanga Sample thawn te erawh result hriat hman a ni lo thung a, heng Sample enfiahna atang hian hri kai mi 9 hmuhchhuah niin mipa 8 leh hmeichhia pakhat an ni a, an vai hian Siaha District mi te vek niin Delhi atanga lo haw an ni a, an zinga pakhat hi Symtom nei, Isolation Ward-a dah niin midang te hi Symtom neilo, Quarantine Centre-a dah te an ni thung.
Mizoram-ah hri kai hmuhchhuah belh an nih lai hian hri kai hmuhchhuah tawh enkawl dam pawh an pung ve zel a, nimin khan Mamit COVID Care Centre-a hri kai enkawl hmeichhe pakhat chu dam taka chhuahtir niin heti hian Mizoram-ah hri kai hmuhchhuah zawng zawng 160 atangin mi 123 te chu enkawl an ni ta a, tunah hian enkawllai mi 37 la awmin hri kai hmuhchhuah atangin enkawl dam hi za zela 76.87 an tling tawh a ni.
India ramah hri kai an la pung chho zel :
Nimin thleng khan India ramah COVID-19 kai hmuhchhuah mi 5,85,493 tling tawhin nunna chan mi 17,400 an tling tawh bawk. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 2,17,931 enfiah leh niin hri kai hmuhchhuah thar 18,653 an awm a, heng mite nen hian tun thlenga hri kai hmuhchhuah hi mi 5,85,493 an tling tawh a, heng zingah hian mi 3,47,978 te chu enkawl dam ni tawhin hei hi za zela 59.43 niin hri kai enkawl mek 2,20,114 an awm thung a, hri kai enkawl mek aiin enkawl dam hi 127,864 in an tam zawk a ni.
Hetihlai hian darkar 24 kalta chhung khan nunna chan mi 507 zet an awm ve leh bawk a, heng te nen hian hri kai zingah nunna chan mi 17,400 an awm tawh bawk a, hei hi hri kai hmuhchhuah zawng zawng atangin zaa 2.97 an tling a ni. ICMR chhinchhiah dan chuan India rama Sample Test tawh zawng zawng chu 88,26,585 a tling tawh bawk a ni.

Comments

Chhiar Hlawhte