Serchhip-a Sa man tur bithliah a ni

Nimin-a Serchhip District Bawrhsap hova Sa Zuartu leh Ar vulhtu pawl bakah tlawmngai pawl te thukhawm chuan Serchhip Bazar-a Sa chi hrang hrang man tur an bithliah.

Serchhip District Bawrhsap, Dr. Lalzirmawia Chhangte hova Serchhip-a Sa man tur chungchang sawihona hunah hian Serchhip Sazuar Association leh Serchhip Ar Vulhtu Pawl bakah Serchhip Sub-Hqrs. YMA, Serchhip District Consumers Association leh Joint VC bakah Legal Metrology Department aiawhte an tel a. Bawrhsap chuan thilman reng reng chu a ngai reng rin theih a nih loh thu sawiin, a sang ve zel tur a nih thu leh chutihrual chuan mipuite pawhin ‘awm’ an tih tlan chu ngaihtuah tel a tul thu a sawi a. Tunhnaiah inkharkhip kalpui a nih avangin thil reng reng a harsa chho ta tih pawh sawiin, hei vang hian mitin te pawhin inhriatthiamna neih tlan a tul thu a sawi bawk.

He hunah hian tunlaia Serchhip Bazar-a Sa chi hrang hrang man te sawiho niin Mizoram khawpui hrang hranga Sa man an hman mek te pawh thlirho a ni a, hemi hnu hian Serchhip-a Sa man tur bithliahin Vawksa chu Kg. khat Rs. 350/- a ni anga, Vawksa rep pawh Rs. 350/- tura tih niin Gram 750 tling ngei a ni thung ang. Bawngsa chu Kg. khat zelah a Thin Rs. 600/-, a Ti, a Kawchhung leh a Irno Rs. 500/- leh a ruh leh a ti sah pawlhin Rs. 450/- a ni anga, Arsa chu puah lohin Kg. ah Rs. 200/- leh puahsa Kg. ah Rs. 300/- a ni bawk ang. He rate thar hi hman nghal tur a ni anga. Sa buk tlinglo leh he rate siam aia sanga lo zuar te chu District Bawrhsap emaw, Legal Metrology Inspector hnenah emaw hriattir tur a ni ang.